Ermera 09 Outubru 2025 – Sekretáriu Estadu Kooperativas (SEKoop), Eng. Arsénio Pereira da Silva, M.Agr., husu formandu sira ne’ebé hetan formasaun kona-ba prosesamentu Bafo Kay Rala atu kontinua implementa matenek sira nian iha komunidade no kooperativa sira.
Deklarasaun ida ne’e nia halo iha loron Kinta (09/10), iha Gleno, Munisípiu Ermera, hafoin entrega sertifikadu ba formandu sira ne’ebé kompleta formasaun kona-ba prosesamentu Bafo Kay Rala sai produtu final oioin hanesan kukis, dosi xokolate, paun no seluk tan.
Formasaun ne’e fasilita husi Diresaun Nasionál Promosaun Produtus Kooperativas (DNPPC) durante semana ida, ho partisipasaun husi 22 formandu (Feto 17 no Mane 5) husi Koperativa Kréditu Uniaun ROHALIK, Kooperativa Moris Kiak Liberta Hamutuk (MKLH) no Grupu Amular.
“Materiál ne’ebé imi simu sei fasilita imi halo produsaun ba Bafo Kay Rala. Tenke aproveita diak atu bele produsaun no fa’an iha kios sira, tanba ne’e bele sustenta ekonomia familia,” hateten husi Sekretáriu Estadu Kooperativas.

Iha momentu ne’e, SEKoop entrega materiál ba kooperativa sira hanesan oven listrik, mixer, basia, mákina tetu no ekipamentu seluk, atu suporta prosesamentu ba produtu lokal nian.

Sekretáriu Arsénio mós husu kooperativa sira prepara-an, tanba Timor-Leste sei sai uma-na’in ba ASEAN Cooperative Ministerial Meeting iha tinan oin, ne’ebé sei iha espozisaun produtu lokal.
“Ita tenke uza oportunidade ida-ne’e hodi hatudu kapasidade produtu kooperativa sira. Buat sira ne’ebé imi halo agora sei uza iha espozisaun iha ASEAN,” nia dehan.

Entretantu formandu, Albina Soares hato’o agradesimentu ba SEKoop no promete kontinua atu halo produsaun ba produtu Bafo Kay Rala hodi bele fa’an iha loja no merkadu lokal.

“Ami nu’udar jovem Ermera sei buka fatin hamutuk hodi halo produsaun no ajuda kooperativa sira,” nia hateten.

Diretora Nasionál Promosaun Produtu Kooperativas, Ana Paula Pacheco mós hateten, formandu sira iha planu atu sai treinadór iha futuru hodi bele habelar esperiénsia sira hetan ba membru kooperativa seluk.

#Média SEKoop#