Dili, 13 Outubru 2025

Ministru Transportes no Komunikasaun, Eng.Miguel Marques Gonçalves Manetelu segunda ohin, realiza enkontru ho Diresaun Nasionál Metereolójia, Jeofizika no UNEP iha sala enkontru Gabinete Ministru Kaikoli Dili.

Iha enkontru ne’e Diretór Nasionál DNMG, Terencio Fernandes Moniz, akompaña husi UNEP headquarter Nairobi, Kenya Bo Ra Kim, husi UNEP PMU Dili James no Husi PMU Dili Shaobar no husi Gabinete Ministru akompaña husi João Olivio Freitas Asesór Tékniku Ministru.

Enkontru ne’e atu Introdúz no atualiza servisu ne’ebé apoiu husi Fundus Klima Verde ne’ebé implementa husi UNEP bá projetu “Hadi’ak Sistema Alerta Sedu hodi harii resilénsia di'ak liután bá Risku Hidrometeorolojiku sira iha Timor-Leste”.

Benefisiáriu husi projetu ne’e mak DNMG. Projetu sira ne’e mak hanesan instala Automatic Weather Station (AWS), iha Baucau, Maliana, Liquiça, Ermera, Manatutu, Lospalos, Viqueque no Atauro, instala mós Automatic Weather Observation System (AWOS) iha Aeroportu Dili no Suai.

Iha mós instalasaun bá Weather Radar 3 iha parte Leste, Centro no Weste. Instalasaun bá Sukat nivel tasi nian. Instala sentru Previzaun Tempu no informa mós bá Ministru Manetelu kona-bá Lei Meteorolójia, Planu Stratéjia Meteorolójia no Enkuadramentu legál servisu Klima nian, ne’ebé submete ona mai gabinete Ministru hodi hetan apresiasaun.

Headquarter Nairobi, Kenya Bo Ra KimBo Ra, mós husu disponibilidade Ministru Manetelu nia tempu hodi halo lansamentu bá operasaun Radar iha tinan oin.

Hafoin rona tiha esplikasaun husi DNMG no UNEP, Ministru Manetelu hato’o agredesimentu no obrigado wain bá UNEP ne’ebé fó apoiu Ministériu Transporte no Komunikasaun liu husi DNMG hodi instala ekipamentus meteorolójia sira ne’ebé modernu.

Aleinde ne’e mós ko’alia kona-bá Lei Meteorolójia, Planu Estratéjia Meterolojia no Enkuadramentu legál servisu Klima nian, governante ne’e hatete Lei Meteorolójia sei lori bá Konsellu Ministru no hetan aprovasaun husi Parlamentu Nasionál, maibé Planu stratejia Meterolójia no Enkuadramentu legál servisu klima sei lori deit bá konsellu Ministru atu hetan apresiasaun.

Ministru Manetelu mós kestiona no ko’alia kona-bá servisu balun ne’ebé DNMG nian papel, instituasaun seluk hanesan IGTL mak foti fali hodi informa bá públiku kona-bá informasaun rai-nakdoko no tsunami, ho kestaun ne’e Ministru Manetelu sei informa bá asuntu ne’e bá Ministru Petróleu no Rekursus Minerais.

𝐌é𝐝𝐢𝐚 𝐌𝐓𝐊