Dili, 14 Outubru 2025

IX Governu Konstitusionál liuhosi Ministériu bá Asuntu Kombatentes Libertasaun Nasionál (MAKLN) hamutuk ho Conselho dos Combatentes da Libertação Nacionál (CCLN), iha tersa-feira, 14 Outubru 2025, ohin, realiza reuniaun jerál ida iha Salaun MAKLN, Caicoli, Dili.

Reuniaun jerál ida-ne’e hodi finaliza preparasaun ikus nian molok hakat bá realizasaun seremónia atu haloot restos mortais hamutk 60 iha Jardím dos Herois Fuiloru, Postu Administrativu Lospalos Villa, Munisípiu Lautém, ne’ebé mak tuir planu sei realiza iha loron 24 fulan-Outubru 2025.

Sua-Exelénsia Ministru bá Asuntu Kombatentes Libertasaun Nasionál (MAKLN), Gil da Costa Monteiro “Oan Soru” rasik mak lidera direta reuniaun ne’e, no partisipante sira mak hanesan, Diretór jerál bá Asuntu Kombatentes Libertasaun Nasionál (DG-ACLN-sigla Português), Joaquim Carvalho de Araújo “Laletek”, Kargu no Xefia sira, Enjiñeiru no Tékniku sira MAKLN nian.

Reuniaun ne’e rasik MAKLN envolve mós ho parseiru sira hosi instituisaun estadu nian mak hanesan, Prezidénsia Repúblika (PR) liuhosi Xefe Kaza Sívil, Ministériu Saúde (MS) liuhosi Xefe Departamentu SEMM-Dili, SNAEM.IP, Martinho da C. A. Correia, Komandu Polisia Nasionál Timor-Leste (PNTL), ho Komandu FALINTIL Força da Defesa de Timor-Leste (F-FDTL), hodi nune’e bele iha koordenasaun téknika ne’ebé di’ak liután durante seremónia haloot restos mortais iha Lautém.

Estadu Timor-Leste liuhosi IX Governu Konstitusionál komprometidu atu kontinua dignifika no garante objetivus konstitusionál sira relasiona bá Rekoñesimentu no Valorizasaun bá kontribuisaun Kombatentes Libertasaun Nasionál sira ne’ebé mate ka lakon iha luta bá Independénsia Nasionál liuhosi Ceremônia de Prestação Honras Fúnebres de Estado dos Restos Mortais, konforme Konstituisaun RDTL, Artigu 11, no Estatutu Kombatentes Libertasaun Nasionál nian, Lei Númeru 3/2006, loron 12 Abríl no primeira-Alterasaun bá Lei Númeru 9/2009, loron 29 Jullu, Segunda-Alterasaun bá Lei Númeru 2/2011, loron 23 Marsu, no terseira-Alterasaun bá Lei Númeru 3/2024, loron 12 Juñu haruka.

Iha tinan 2025 ne’e, MAKLN pretende implementa desizaun polítika IX Governu Konstitusionál nian atu haloot dadaun Saudozu sira-nian Restos Mortais ne’ebé sei haklaken iha kada Uma-Mahon no Ossuário sira iha Munisípiu tolu (3) mak hanesan, Lautem, Manatuto no Likisá liuhosi Ceremônia de Prestação Honras Fúnebres de Estado dos Restos Mortais.

(𝐌𝐞́𝐝𝐢𝐚 𝐆-𝐌𝐀𝐊𝐋𝐍)