𝐃𝐢𝐥𝐢, Tersa 𝟏𝟒 𝐎𝐮𝐭𝐨𝐛𝐫𝐮 𝟐𝟎𝟐𝟓;

Sekretariu Estadu ba Arte no Kultura (SEAK), Sua Eselensia Jorge Soares Cristovão, Partisipa iha serimonia forum Tais 2025, ho tema Prezerva Patrimoniu, Hakbi’it Soru nain sira no avansa oportunidade Ekomonika, ne’ebe ofisialmente abertura husi S.E Prezidente Republika (PR), Dr.Jose Ramos Horta, iha Palasiu Prezidensial Aitarak Laran Dili.

Timor-Leste selebra Fórum Tais 2025, eventu istóriku ida ne’ebé halibur reprezentante governu nian, parseiru dezenvolvimentu sira, no feto soru-na’in sira hodi selebra tradisaun soru nian ne’ebé riku iha nasaun ne’e.

Eventu ne’e fo’o sai konaba susesu sira husi rede Rede Soru Na’in (RSN), hametin polítika sira, no buka dalan inovadora sira ba meius subsisténsia sustentável iha setór Tais.Tais, textil tradisionál Timor-Leste nian ne’ebé soru ho liman, hanesan símbolu forte ida ba nasaun nia identidade kulturál no fonte rendimentu ne’ebé vital ba feto rurál sira.

Prezidente Republika José Ramos-Horta, ne’ebé elojia reziliénsia no kriatividade husi feto soru-na’in sira; "Soru tais la'ós de'it artezanatu ida; ida-ne'e maka ita-nia eransa nia fuan no dalan ida ba feto sira-nia empoderamentu ekonómiku. Governu iha kompromisu atu apoia polítika sira ne'ebé prezerva ita-nia kultura no iha tempu hanesan garante mos meius subsisténsia sustentável ba ita-nia Soru Na'in sira."

Sekretáriu Estadu Arte no Kultura, Jorge Soares Cristavão hateten; "Proteje Tais nu’udar parte patrimóniu kulturál Timor-Leste nian ne’e importante tebes. Liuhusi kolaborasaun entre governu, parseiru dezenvolvimentu sira, no soru na’in sira, ita bele asegura katak abilidade tradisionál sira-ne’e preserva ba jerasaun sira enkuantu kontribui ba kreximentu ekonómiku feto nian."

Xefe Misaun UN Women Timor-Leste, Nishtha Satyam, subliña importánsia hosi igualdade jéneru iha dezenvolvimentu ekonómiku; "Igualdade jéneru no feto sira-nia empoderamentu ekonómiku maka sentrál ba dezenvolvimentu sustentável. Apoia inan feton soru nain liuhosi polítika sira ne'ebé bazeia ba evidénsia, investimentu no kolaborasaun entre entidade oioin, garante katak sira-nia abilidade kulturál sira sei tradús ba meius subsisténsia ne'ebé reziliente."

Fórum ne’e konklui ho aprezentasaun kulturál no kompromisu ida husi parte interesada hotu-hotu atu kontinua apoia soru na’in Tais sira, hodi garante sira-nia abilidade, kriatividade, no meius subsisténsia prezervadu no aumenta sai diak liu tan.

Fórum Tais 2025 ne’e organiza husi Timor Aid no Asosiasaun Soru Na’in - Rede Soru Na’in (RSN), ho finansiamentu no apoiu tékniku husi UN Women Timor-Leste no organiza husi Gabinete Prezidésia Repúblika Demokrátika Timor-Leste. Fórum Tais dahuluk hala’o iha tinan 2023, ne’ebé organiza husi Timor Aid no Fundasaun Alola ho UN Women nia apoiu. Fórum 2025 halibur ofisiál sira governu nian, parseiru dezenvolvimentu sira, sosiedade sivíl, pratikante kulturál sira, no reprezentante sira mídia nian.

#Media_SEAK