Press Release

Díli, 16 Outubru 2025 – Sua Exelénsia Ministra Edukasaun, hamutuk ho Segundu Komandante Jerál PNTL, Sr. Pedro Belo no ekipa tékniku sira hodi halo abertura ba koresaun ezame admisaun ba ajente Polísia Nasionál foun Timor-Leste nian, iha Akademia PNTL Comoro.

Iha abertura ne’e Sua Exelénsia Segundu Komandante Jerál PNTL, Sr. Pedro Belo afirma, durante nia prosesu hahú husi loron 5 fulan agostu to’o mai iha faze ba selesaun dokumentu sira no kontinua ba iha prova kulturál ne’ebé mak fahe ba kada munisípiu inklui RAEOA no Ataúru ne’ebé remata iha loron 12 fulan ne’e no lori kedas mai iha nasionál, tanba ne’e ohin halo abertura ba koresaun ezame ka provas kulturál nian.

“Iha fatin ida ne’e, hakarak agradese ba Sua Exelénsia Ministra Edukasaun ne’ebé mak iha kooperasaun di’ak tebetebes ho Ministériu Interiór hodi delega ita-nia ekipa tékniku sira ne’ebé iha kualidade no koñesimentu di’ak hodi apoiu durante ne’e hodi profesionál tebetebes, tanba ami mesak de’it labele, maibé ho ekipa tékniku sira-nia apoiu ohin ita bele to’o ona iha faze ida ne’e”, dehan Segundu Komandante Jerál PNTL.

Iha fatin hanesan, Sua Exelénsia Ministra Edukasaun, Dra. Dulce de Jesus Soares, hateten, iha okaziaun ida-ne'e, hato'o apresiasaun kle'an ba tékniku no asesór sira hotu ne'ebé ho dedikasaun no profisionalizmu hodi asegura katak, ezame sira-ne'e loloos no iha prosesu korrije ezame admisaun ba Ajente Polísia Nasionál foun Timor-Leste nian.

“Halo ezame hirak-ne'e reprezenta enkuadramentu fundamentál ida iha prosesu rekrutamentu, tanba asegura katak ita-nia polísia nia ajente sira sei hili tuir méritu, kompetisaun no transparénsia. PNTL hala'o papél sentrál ida iha prezervasaun seguransa, orden públiku no konsolidasaun Estadu Direitu Demokratiku iha Timor-Leste. Tanba ne'e, tenke asegura kualidade rekursu umanu sira-nian husi momentu dahuluk liuhusi prosesu avaliasaun ida-ne'ebé rigorozu no justu”, dehan S. E. Ministra Edukasaun.

Governante ne’e hatutan, Ministériu Edukasaun hetan onra hodi servisu hamutuk ho Polísia Nasionál iha esforsu hamutuk ida-ne'e. Ita-nia kontribuisaun, liu husi organizasaun no dezenvolvimentu prosesu ezaminasaun nian ho objetivu atu asegura kredibilidade, igualdade no konfiansa husi sosiedade Timor-Leste tomak.

#jornalistaluisalmeida

#MédiaME