Press Release

Aileu, 09 Outubru 2025 – Sua Exelénsia Ministra Edukasaun, Dra. Dulce de Jesus Soares, hamutuk ho Embaixadora Australia, Sra. Caitlin Wilson no parseiru sira hala’o vizita ba eskola Ensinu Báziku Sentál Roluli no Ensinu Báziku Filiál Buburnaro, iha Postu Administrativu Remexio, Munisípiu Aileu hodi halo observasaun ba servisu mentoria no mós progresu prosesu aprendizajen no jestaun sala-aula ne’ebé antes ne’e hetan ona formasaun ho tulun husi PHD Austrália.

Iha sorumutu ne’e, Sua Exelénsia Ministra Edukasaun, Dra. Dulce de Jesus Soares, hateten, governu la servisu mesak, maibé hamutuk ho parseiru sira husi nasaun oin-oin hodi bele apoiu iha konstrusaun edifísiu eskola, apoiu merenda eskolár, apoiu formasaun hodi lori dezenvolvimentu edukasaun ne’e ba oin.

“Ministériu Edukasaun ne’e parseiru ho PHD, tanba ne’e Embaixadora mai iha-ne’e atu haree rezultadu husi apoiu ne’ebé mak PHD fó mai Ministériu Edukasaun hodi apoiu mentoria ba eskola sira no mós ho programa oin-oin, hanesan: formasaun profesór, formasaun lideransa no jestaun sala-aula iha eskola sira. to’o ikus ohin Embaixadora mai haree rasik katak sala-aula, sala profesór jere kapás loos”, dehan Exelénsia Ministra Edukasaun.

Iha fatin hanesan, Sua Exelénsia, Embaixadora Australia, Sra. Caitlin Wilson, akrexenta, hodi agradese bele mai iha-ne’e atu rona no haree kondisaun eskola no preokupasaun manorin sira nian iha eskola ida- ne’e, atu nune'e , bele apoiu di’ak liután iha futuru.

“Servsiu hamutuk entre governu Austália no Governu Timor-Leste, liuliu Ministériu Edukasaun, iha ámbitu programa ALMA ne’ebé mak kompleta ona ohin ba tinan 10, tanba ne’e, iha biban ida-ne’e, ita iha oportunisdade hodi hasoru malu ho mentór lokál husi Munisípiu Aileu nian hodi rona kona-ba oinsá mak ita bele servisu hamutuk hodi hadi’a kualidade edukasaun iha Timor-Leste, no ha’u hakarak ita-boot sira onestu no nakloke ba saida de’it mak ita-boot sira hakarak hato’o”, dehan Embaixadora.

Aleinde ne’e, Diretór EBF Roluli, hateten, Eskola EBC Roluli iha nia Filiál hamutuk 8 no Pré-Eskolár 2, eskola refere iha númeru profesór sufisiente, tanba kolokasaun profesór bolsa kandidatu ne’ebé mai iha eskola ne’e ho nia filiál sira hamutuk na’in 32. Tanba ne’e, lori komunidade edukativa nia naran hakarak agradese ba Sua Exelénsia Ministra Edukasaun nia servisu.

“Iha tinan 2023 ba kotuk, ami iha profesór na’in 16 ne’ebé kobre eskola 10 no dalaruma iha eskola ida profesór na’in 1 bele hanorin husi primeiru anu to’o sestu anu, maibé ho Sua Exelénsia Ministra Edukasaun nia servisu maka iha tinan 2024, ami-nia moras durante ne’e ita-boot konsege kura duni, nune’e dadaun , ami totál profesór husi eskola 10 ne’e hamutuk na’in 51", dehan Diretór Eskola.

Diretór Eskola ne’e hatutan, Profesór iha eskola 10 ne’e sufisiente ona, maibé problema mak limitasaun sala-aula ne’ebé provizoriamente iha 33 sala-aula, maibé nesesidade presiza ne’e hamutuk na'in 45, no fiar katak neneik ba neneik sei rezolve problema refere maske la atinji to’o pursentu 100%, tanba la’os Aileu de’it, maibé iha fatin seluk ne’ebé mós presiza apoiu.

Vizita ida -ne’e, demonstra kompromisu Governu Timor-Leste hamutuk ho Governu Austrália, iha esforsu kontínua atu hadi’a kualidade aprendizajen no apoiu formasaun profesór iha nível munisípiu, hanesan parte husi objetivu nasionál atu fortifika sistema edukasaun iha rai-laran.

#jornalistaluisalmeida

#MédiaME