Press Release

16 - Oktober - 2025

Lori família vulnerável sira iha Suku Uaiguia, hakarak hato’o apresiasaun ba Ministra Solidariedade Sosiál no Inkluzaun, Sra. Verónica das Dores, ne’ebé iha domin hanesan inan hodi vizita maluk vulnerável sira iha áreas remotas, liuliu vulnerável sira ne’ebé durante ne’e hasoru hela difikuldade moris loron-loron nian.

“ami hakru'uk ba Ministra, liuliu tanba ita-nia domin no laran luak, lori ona ita mai vizita família no grupu vulnerável sira husi suku Uaguia no Ossorua. Ami hotu-nia dezeju matak malirin ba Ita-Boot ho ekipa, hein katak tempu ruma sei vizita fali ami, hodi kontinua taumatan ba maluk vulnerável sira,” dehan Xefi Suku Uaguia, Aquilis Ximenes Guterres, antes distribui apoiu umanitária iha Suku refere, Segunda-feira (13/10/2025).

Iha fatin hanesan, Ministra informa ba Autoridade Lokál sira katak, bainhira halo pedidu ba ai-han bele komunika ho Sentru Solidariedade Sosiál Munisípiu Viqueque.

“ami nafatin apoiu ai-han no la’ós ai-han ba maluk vulnerável sira, maibé mós bele apoiu ai-han ba lia mate, harii uma lisan ka halo servisu ba interese komum, bele komunika mai MSSI ninia sentru iha Munisípiu hotu”, katak Ministra.

Objetivu vizita ba Viqueque tanba mós atu haree Idozu, Justino iha Uatulessu, Suku Uai-mori, ne’ebé hela iha fatuk kuak durante tinan 26 dezde 1999. Hafoin vizita mós Restos Mortais iha Bubur Laran, Aldeia Mea Wai, Suku Uai-Mori, Postu Administrativu Viqueque Vila.

Iha oportunidade ida-ne’e, Ministra husu ba Autoridade Lokál atu rejistu inan-aman sira bainhira idade to’o ona hodi asesu ba pensaun idozu nian.

Kona-ba distribuisaun ai-han no pakote komplementár ba Suku Uaguia no Suku Ossoru, benefisiáriu hamutuk 90, kompostu husu Suku Uagia 60 benefisiárius ho Suku Ossorua 30 benefisiárius. Depoizde distribuisaun ai-han, ekipa CNR mós halo atendimentu no entrega ekipamentu mobilidade ba Ema ho Defisiénsia.

Mídia MSSI