Press Release

Vise-Ministru ba Asuntus Parlamenatres (VMAP), S.E Adérito Hugo da Costa no Provedór Direitus Umanus S.E Virgílio da Silva Guterres hato’o Reflesaun Kona-ba Memória, Justisa no Liberdade Imprensa iha ambito selebrasaun “Cinquentenário Balibo Five” ©Sergio/MediaGVMAP

Balibo, 14 Outubru 2025 – Vise-Ministru ba Asuntus Parlamentares, S.E Adérito Hugo da Costa, hamutuk ho Provedór ba Direitus Umanus no Justisa, Virgílio da Silva Guterres “Lamukan”, sai oradór prinsipál iha konferensia imprensa MEET THE PRESS ne’ebé realiza hodi komemora aniversáriu ba dala 50 husi kazu Balibo Five.

Eventu ne’e hala’o ho tópiku “Cinquentenário Balibo Five: Memória, Justiça e Liberdade de Imprensa“, hodi fo atensaun ba memória jornalista Austrália nain lima ne’ebé mate iha Balibo iha tinan 1975.

Durante oras balun nia laran, VMAP, S.E Adérito Hugo da Costa fahe esperiénsia no sofrimentu ne’ebé akontese durante okupasaun Indonézia iha Timor-Leste. Nia enfatiza katak kazu asasinatu ba jornalista Austrália nain lima ne’e to’o ohin loron seidauk hetan justisa, no sira nia aan seidauk hetan.

“Konspirasaun estadu ho estadu ba aktu ida ne’ebé la respeita direitus umanus. Ita nia esperansa boot katak ho trajédia ida ne’e, konspirasaun ida ne’ebé konxiente tebes to’o agora, hakarak ka la hakarak, estadu rua nian entre Indonézia ho Austrália tenke konsidera situasaun sira hanesan ne’e,” dehan VMAP.

Vise-Ministru ba asuntus parlamentares mós subliña katak problema ne’e la’ós de’it kona-ba jornalista nain lima, maibé konspirasaun Jakarta nian durante tinan 24 nia laran iha Timor-Leste husik hela istória traumátika nakukun ba família barak iha nasaun ne’e.

“Família barak seidauk hatene ema sira ne’ebé mate nia isin lolon iha ne’ebé, inklui Saudozu Nicolau Lobato, líder nasionál Timor-Leste nian ne’ebé mate iha konflitu ho forsa okupasaun,” dehan VMAP.

Eventu ne’e reprezenta pasu importante ida hodi mantein memória viktima sira nia moris no kontinua buka justisa ba violasaun direitus umanus ne’ebé akontese durante okupasaun.

Jornalista Austrália nain lima – Greg Shackleton, Gary Cunningham, Tony Stewart, Malcolm Rennie, no Brian Peters – mate iha Balibo, Timor-Leste, iha loron 16 Outubru 1975, bainhira sira kobre invasaun Indonézia nian. To’o ohin loron, sira nia família no komunidade internasionál kontinua husu klarifikasaun kompletu no justisa ba sira nia mate.

Eventu ne’e partisipa masimu husi Prezidente RTTL EP, Antigu jornalista Timor-Leste nian, Família husi jornalista nain lima (5) ne’ebé mate iha Balibo, Reprezentante PNTL, Kargus sefia seluk husi governu no sosiedade sivíl. ©MediaGVMAP

Fontes: Selebrasaun “Cinquentenário Balibo Five: Memória, Justiça e Liberdade de Imprensa” | Portal GVMAP