Asuntu : Proposta Lei Kódigu Rekuperasaun ba Insolvénsia Aprovadu iha Diskusaun Espesialidade Proposta de Lei nº 13/VI (2ª), kona-ba Kódigu Rekuperasaun ba Insolvénsia, ne’ebé Governu aprezenta liu husi Ministériu Komérsiu no Indústria, aprova ho unanimidade iha diskusaun espesialidade, ho votu afavór 9, kontra 0 no abstensaun 0. ©MediaGVMAP Aileu – Diskusaun espesialidade ne’ebé hala’o iha Kafé Munisípiu Aileu durante semana 6 rezulta iha proposta alterasaun hamutuk 29 husi Deputadu sira. Mudansa sira ne’e aplika ba artigu balun husi artigu 225 ne’ebé inklui iha Proposta Lei ne’e. Deputadu Joaquim Boraluli, hanesan proponente ida, esplika katak nia propoin alterasaun ba artigu balun tanba konsidera Governu laiha definisaun klaru konaba konteúdu proposta nian. Reprezentante povu ne’e enfatiza katak Governu presiza define ho loloos liafuan sira iha proposta lei ne’e, atu labele kria dúvida ba autór judisiáriu sira. Vise-Ministru Komérsiu no Indústria, Augusto Junior Trindade, destaka importánsia lei ne’e tanba Timor-Leste sei sai membru ASEAN no tenki priense rekezitu sira ne’ebé ezije. Lei ne’e sei define konaba kódigu ba rekuperasaun subvensaun no insolvénsia. Governante ne’e esplika katak razaun prinsipal husi Lei ida ne’e mak atu priense rekezitu ASEAN nian, liuliu iha área rekuperasaun no insolvénsia. Lei ne’e importante ba kooperasaun Timor-Leste ho nasaun sira seluk iha Sudezte Aziátiku, partikularmente ba estabelesementu kompañia sira. Governu presiza kolabora ho Banku Sentrál no MCAE (Ministériu Koordinasaun Asuntu Ekonomiku) bainhira lei ne’e tama iha prátika, atu regula situasaun sira ne’ebé bele mosu. Prezidente Komisaun A, Deputadu Patrocínio Fernandes dos Reis, hateten katak Lei ne’e hanesan kondisaun ida bainhira Timor-Leste tama ba organizasaun ASEAN. Lei sira ne’e sei fornese seguransa no konfiansa ba investór sira, instituisaun finaseira hanesan banku, no emprezáriu sira atu halo kréditu. Membru Parlamentu ne’e realsa katak lei ne’e mós bele enkoraja emprezáriu sira no orienta sira atu sai profisionál no organizadu, kontribuindu ba dezenvolvimentu ekonómiku nasaun nian. Lejislasaun sira ne’e importante no presiza hanesan kondisaun fundamentál ba progresu. Maske diskusaun ba Proposta Lei nº 13/VI (2ª) hala’o durante semana 6, tuir Prezidente Komisaun A, prosesu seidauk remata. Relatóriu ba debate espesialidade iha mudansa lubuk ida ne’ebé presiza revizaun ho kuidadu ba testu finál, antes entrega fila fali ba Parlamentu Nasionál no meza atu halo desizaun finál globál. ©MediaGVMAP
Data Publica : 16 Oct 2025
Descrisaun :
