Press Release

Díli, 17 Outubro 2025

Xefe Gabinete, Ministru Transportes no Komunikasaun, José da Costa hamutuk ho Prezidente Konsellu Administrasaun (ANATL, E.P.), Romualdo António Soares hamutuk ho Parseirus doadores husi ADB, JICA, DIFAT, nomos PMC supervizaun konsultór, hala’o vizita bá fatin destinasaun importante sira iha projetu nia laran.

Iha vizita ne’e ekipa sira bá haree pontu importante sira mak hanesan meius asesu bá área projetu, ofísiu tempráriu kompañia WASKITA no (ANATL, E.P.), ikus maka área demolizasaun waskita iha Aldeia Beto-tasi Suku Madohi, Postu Administrativu Dom Alexo Munisípiu Díli.

Vizita ne'e atu lori parte interesada (stakeholders) sira, hodi haree direta projetu iha Aeroportu Internasionál Prezidente Nicolau Lobato, nune’e sira bele hatene progresu husi konstrusaun espansaun pista, Aeroportu Internasionál Prezidente Nicolau Lobato (AIPNL), Comoro, ne’ebé kaer husi kompañia PT. WASKITA KARYA husi Indonézia.

Parte Interesada kontenti iha kompromisiu nafatin apoiu prosesu ne'ebé orasa ne'e lao hela, ho nune’e bele harí obra ida ho kualidade di’ak iha Timor-Leste.

Governu, parseirus no operadores aeroportuáriu halo mós aprosimasaun ho komunidade afetadu sira iha Marinír, maioria koopera tebes liuhosi meius komunikasaun ho komunidade sira governu agradese ho lideransa komunitária suku madohi nia.

Komunidade afeitadu sira mós antusiásmu, hakarak haree Timor-Leste bá futuru iha aeroportu ida ne’ebé kualidade no furak iha ema hotu nia matan.

aleinde ne’e mós Konsellu Administrasaun (ANATL, E.P.), hamutuk ho Ministériu Transportes no Komunikasaun (MTK), realiza sorumutu ho parseiru sira, hodi relata no atualiza progresu servisu.

𝐌é𝐝𝐢𝐚 𝐌𝐓𝐊