Press Release

Likisá, 16 outubru 2025 – Sua Exelénsia Ministra Edukasun , Dra. Dulce de Jesus Soares hamutuk ho Embaixadór Japaun mai Timor-Leste Sr. Kimura Tetsuya no Prezidenete Autoridade Munisípiu Likisá Sr. Paulino Ribeiro halo inaugurasaun ba eskola Ensinu Báziku Sentrál 03 Maubara, Postu Administrativu Maubara Munisípiu Likisá.

Iha diskursu, Sua Exelénsia Ministra Edukasun, Dra. Dulce de Jesus Soares hateten, ohin inaugura eskola ida ne’ebé harii ho fundu sira husi Japaun, liuhusi Fundasaun Hadia Dezenvolvimentu Ekonomia Rurál (HADER).

“Programa ida-ne’e sai susesu duni tanba guvernu Japaun rekoñese katak nasaun ida labele dezenvolve husi-nia governu de’it, maibé presiza kontribuisaun husi ema hotu iha nível organizasaun, komunidade no individu. Nune’e halo parseria entre governu ho sosiedade sivíl maka Timor-Leste bele la’o ba oin,” tenik S.E. Ministra.

Membru governu ne’e akrexenta tan katak, Japaun sai belun boot ho Timor-Leste dezde tinan 1999 no apoiu barak ona, relasiona ho infrastrutura ne’ebé presiza tebes, maibé mós liuhusi projetu sira ne’ebé apoia kurríkulu no resentamente ho profesór matemátika ne’ebé ajuda hanorin ka halo co-teaching.

Enkuantu iha sorin seluk, Embaixadór Japaun mai Timor-Leste Sr. Kimura Tetsuya argumenta, Japaun apoiu ona eskola lubuk ida iha Timor-Leste, tanba ne’e ho inaugurasaun ba eskola ida ohin, eskola hamutuk haatnulu (40) resin maka hetan apoiu husi governu Japaun.

“Governu Japaun konsidera edukasaun maka pilár importante ida ba dezenvolvimentu nasaun nian, tanba ne’e ba eskola refere governu Japaun apoiu liuhusi konstrusaun edifísiu maibe kona-ba materiál sira hanesan kadeira ho meza ne’e hetan apoiu husi Ministériu Edukasaun rasik” dehan Embaxadór Japaun.

Iha serimónia inaugurasaun eskola EBC 03 Maubara hetan prezensa husi Sua Exelénsia Ministra Edukasun, Dra. Dulce de Jesus Soares, Embaixadór Japaun mai Timor-Leste Sr. Kimura Tetsuya, Prezidenete Autoridade Munisípiu Likisá Sr. Paulino Ribeiro, Komadante Eskuadra PNTL Maubara, Autoridade Lokál, Profesór no Estudante sira.

#jornalistapauladelgado

#MédiaME