Press Release

Díli, 17 Outubru 2025 – Sua Exelénsia Ministra Edukasaun, Dra. Dulce de Jesus Soares, hamutuk ho Sua Exelénsia Sekretáriu Estadu Ensinu Seundáriu Jerál no Ensinu Sekundáriu Tékniku Vokasionál, Sr. Domingos Lopes Lemos no Dirijente Sira Ministériu Edukasaun nia husi Nasionál no Munisipál, hala’o serimónia distribuisaun pontu ezame nasionál ne’ebé tuir kalendáriu, sei hahú iha segunda-feira, loron 20 fulan outubru. Serimónia distribuisaun ne’e realiza iha Sentru Impresaun Comoro.

Iha diskursu, Sua Exelénsia Ministra Edukasaun, Dra. Dulce de Jesus Soares, hateten, serimónia ohin loron ne’e hanesan marka importante ida ba Ministériu Edukasaun, tanba estudante sira ne’ebé kompleta ona Ensinu báziku 9⁰ anu no Ensinu Sekundáriu 12⁰ anu, semana oin, husi segunda-feira, loron 20 tama ona ba ezame nasionál, iha territóriu laran tomak.

“Ohin loron 17 fulan outubru Ministériu Edukasaun hala’o serimónia distribuisaun pontu sira ezame nasionál nian, ne’ebé liuhusi prosesu naruk ida, hahú husi elaborasaun pontu ezame, impresaun pontu ezame no ohin distribui ba dirijente sira husi munisípiu inklui RAEOA no Ataúru hodi lori ba munisípiu idaidak, atu semana oin bele hahú ezame nasionál tuir kalendáriu ne’ebé iha”, dehan S. E. Ministra Edukasaun.

Governante ne’e agradese ba manorin no inan-aman sira, tanba ho pasiénsia no matenek hodi konsege eduka oan sira to’o iha faze ezame nasionál ne’e, nune’e hein katak prosesu ne’e la’o ho di’ak, tanba oan sira mak jerasaun ida ne’ebé sei kontinua lidera nasaun ne’e ba oin.

Iha fatin hanesan, Sua Exelénsia Sekretáriu Estadu Ensinu Seundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, agradese tebes ba Diretór Servisu Edukasaun Munisípiu no Superintendente sira ne'ebé mak loron ohin bele hamutuk iha fatin hodi halo distribuisaun ba pontu ezame nasionál no lokál ni'an.

“Husu ba Diretór Nasionál no Munisípiu sira hotu tenki halo liña kordenasaun ho autoridade lokál no autoridade seguransa sira, nune’e bele asegura ezame nasionál no lokál ne’e to’o remata ho di’ak”, dehan S. E. Sekretáriu Estadu ESG no ESTV.

Totál finalista husi Ensinu Báziku ne’ebé mak atu partisipa iha ezame nasionál hamutuk 26.008. Ensinu Sekundáriu Jerál, totál hamutuk 24.196, Ensinu Sekundáriu Tékniku Vokasionál, hamutuk 3.529, Ensinu Rekorente 411. Totál husi estudante finalista ba tinan akadémiku 2025 ne’ebé mak sei partisipa iha ezame nasionál, hamutuk 54.144.

#jornalistaluísalmeida

#MédiaME