Press Release

𝐃𝐢𝐥𝐢, 𝟐𝟎 𝐎𝐮𝐭𝐨𝐛𝐫𝐨 𝟐𝟎𝟐𝟓: Sekretariu Estadu Interinu SEFOPE, atual Sekretáriu Estadu Dezenvolvimentu Lokál (SEDL), Mateus W. dos Santos Tallo, hamutuk ho Diretúr Jeral Formasaun Profissional no Empregu, Carlito do Rosário Cabral, Xefi Gabinete nomos Kargu Xefia sira iha SEFOPE, simu Delegasaun Empregadór Sazonal Rekonesidu (RSE), mai Timor-Leste ne’ebé akompaña husi Embaixadór Nova Zelândia ba Timor-Leste; Helen Tunnah.

Objetivu husi Vizita introdusaun ida ne'e mak atu introdús ba ekipa delegasaun, Timor-Leste nia forsa traballu ne’ebé vibrante tebes, patrimóniu kulturál no istóriku sira, nomos poténsia ne’ebé buras nu’udar nasaun ne’ebé iha oportunidade aas ba empregu sazonál iha rai liur. Ho vizita ida nee mos espera bele kontinua hametin lasu amizade entre Guvernu Timor-Leste ho empregadór prinsipál sira husi programa Traballu Sazonal nian.

Durante Vizita, empregadór husi Nova Zelândia sira ne’e sei hasoru malu ho Ofisiál relevante sira Governu nian, kompaña lokál, no traballadór potensiál sira hodi hetan hanoin konaba too iha ne’ebé abilidade, prontidaun, nomos aspirasaun husi kandidatu traballadór Timor oan sira ne’ebe hatudu ona interese atu partisipa iha Programa RSE ida ne’e. Laos ne’e deit, Empregadór sira mos sei halo vizita direta ba sítiu/fatin istóriku nomos kultural Timor-Leste nian ne’ebé prepara ona.

Iha serimónia Bemvindu ho delegasaun Empregadór Nova Zelândia nian, Sekretáriu Estadu rekuñese importánsia no benefísiu husi Programa RSE nee rasik; _“Programa RSE iha papél importante hodi fornese ba ita-nia sidadaun sira ho oportunidade empregu ne’ebé ho valór internasional, kontribui ho pozitivu ba ita-nia ekonomia no dezenvolvimentu pesoál ita-nia forsa traballu nian, nune’e Abilidade, disiplina, no étika serbisu ne’ebé ita-nia traballadór sira hetan iha Nova Zelándia sei sai rikusoin ba Timor Leste nia dezenvolvimentu ne’ebé la’o daudaun_ ”dehan Sekretáriu Estadu.

Governu Nova Zelãndia hahú hatama Timor-Leste nudar nasaun partisipante iha Programa RSE ida ne’e iha loron 28 Abríl 2025, no kontinua ho assina akordu ho Guvernu Timor-Leste liu husi Sekretáriu Estado Formasaun Profissional no Empregu (SEFOPE) iha loron 21 Agostu 2025 iha Dili, Timor-Leste. Programa ida ne’e fornese oportunidade ba Timor-oan sira atu serbisu iha Nova Zelândia, iha àrea Hortikultura & Vitikultura liu husi aplikasaun online ne’ebé hahú ona iha loron 8 Setembro 2025 liubá.

Media SEDL

Fontes: https://www.facebook.com/share/p/14P5oahYwoh/