Press Release

Díli-Kuarta, 15/10/2025- Sua Exelénsia Ministra Finansas Sra. Santina José Rodrigues Ferreira Cardoso, hetan konfiansa husi Konsellu Ministru (KM) atu halo negosiasaun ho Banku Aziátiku Dezenvolvimentu (ADB) kona-ba empréstimu, ho komponente subvensaun, ba Projetu Hadi’a Estrada Nasionál – Faze I.

Projetu, ho orsamentu estimadu dolar amerikanu millaun 84,8, inklui modernizasaun kilómetru 42 hosi estrada nasionál entre Lospalos ho Iliomar, reabilitasaun ba ponte tolu (Seisál, Borouai no Malailada) ne'ebé lokaliza entre Baucau ho Lautein.

Governu sei implementasaun infraestruturas no reforsu institusionál hodi hametin reziliénsia klimátika ba komunidade iha suku neen, ho risku aas ne’ebé lokaliza entre Lospalos no Iliomar, ne’ebé vulneravel ba inundasaun no rai-maran.

Finansiadu prinsipalmente liuhosi empréstimu konsesionál dolar amerikanu millaun 75 no subvensaun dolar amerikanu millaun 3 hosi ADB, projetu ne’e ho objetivu atu hadi’a konektividade rodoviária, hasa’e seguransa no promove reziliénsia klimátika iha komunidade lokál sira, tuir Planu Estratéjiku Dezenvolvimentu 2011–2030 no ho metas nasionál atu adapta ba mudansa klimátika.

Tuir análize makroekonómika no fiskál, finansiamentu ida-ne’e la fó impaktu ba estabilidade orsamentál ka sustentabilidade dívida públika nasionál, ne’ebé mantein iha nivel prudente no menus liu duke limite referénsia internasionál.

Aleinde ne’e, kustu efetivu hosi totál empréstimu ne’ebé iha, ki’ik liu retornu estimadu hosi Fundu Petrolíferu Timor-Leste nian, ne’ebé garante katak rekursu ba finansiamentu ida-ne’e iha nafatin vantajen ekonómiku no sustentável, kontribui hodi halo investimentu estratéjiku sein fó impaktu ba ekilíbriu hosi kontas públikas.

#Informasaun Ho #Fotografia #Ekipa #Media #Ofisiál #MinistériuFinansas #Asesu Iha #Portál #Governu #Timor-Leste, Sorumutu Konsellu Ministrus loron 15 fulan-outubru tinan 2025 « Governu Timor-Leste

Fontes: https://www.facebook.com/share/p/1Eq1uunLqa/