Press Release

Díli-Kinta 16/10/2025, Sua Exelénsia Ministra Finansas Sra. Santina José Rodrigues F. Viegas Cardoso, sai oradora iha Seminariu Nasionál Panorama Orsamentál 2026 ho tema “Investimentu iha Transformasaun Nasionál, Integrasaun Rejionál no Dezenvolvimentu Inkluzivu”, ne’ebé realiza ohin to’o aban mak foin remata.

Durante aprezentasaun S.E Ministra Finansas destaka “ita nia Orsamentu Jerál Estadu (OJE), sai hanesan mákina prinsipál ida atu dudu ita-nia kresimentu ekonomiku, liuliu projetu sira ne’ebé iha kapitál dezenvolvimentu. Ita fiar katak projetu sira ne’e bele fó impaktu ba diversifikasaun ekonomika, atu setór sira seluk mós krese no hola parte ba kontribuisaun iha ita-nia Produtu Internu Brutu (PIB) la’ós minarai nian.”

Timor-Leste mós iha dezafiu fiskál lubuk ida, katak ita sei kontinua dependensia ba fundu petrolíferu, investimentu makaas ba infraestrutura no setór sira seluk maibé mós presiza kria kondisaun di’ak liubá setór privadu atu bele krese.

Semináriu ne’e organiza husi Parlamento Nasional Timor-Leste, hahú husi loron 16-17 fulan Outubru. Sesaun aprezentasaun iha dader nian mai husi S.E Vise-Primeiru Ministru, Ministru Kordenadór Asuntu Ekonomiku no Ministru Turizmu Ambiente Interinu Sr. Marcos da Cruz, Sua Exelénsia Ministra Finansas Sra. Santina José Rodrigues F. Viegas Cardoso, S.E Governador Banku Sentrál Interina Sra. Sara Lobo Brites. Oradór sira parte loraik nian S.E Prezidente Tribunál Rekursu Sr. Afonso Carmona, S.E Ministra Solidariedade Sosiál no Inkluzaun Sra. Verónica das Dores, nomós Prezidente Autoridade RAEOA.

Seminariu Nasionál Panorama Orsamentál 2026 ne’e realiza iha sala auditorium Kayrala Xanana Gusmão Ministériu Finansas Aitarak-laran. Hetan prezensa másimu husi lider Órgaun Soberania, Distintu Deputadu, Membru Governu inklui reprezentante Banku Mundiál.

#Foto: #Ekipa #Media #Ministériufinansas

Fontes: https://www.facebook.com/share/p/17FgveYjWW/