Press Release

Dili, 17 Outubru 2025

IX Governu Konstitusionál liuhosi Ministériu bá Asuntu Kombatentes Libertasaun Nasionál (MAKLN), hamutuk ho Conselho dos Combatentes da Libertação Nacional (CCLN), planeia hela atu entrega “Sertificado de Ações ka Sertifikadu Asaun (Saham) nian bá Veteranus no sira-ninian família sira ne’ebé partisipa ona iha Fundo Investimento dos Veteranos (FIV), uainhira kapitál investimentu atinje dolar-amerikanu Millaun Atus-ida ($100.000.000).

Sua-Exelénsia Ministru bá Asuntu Kombatentes Libertasaun Nasionál (MAKLN), Gil da Costa Monteiro “Oan Soru”, hato’o asuntu ne’e, uainhira halo aprezentasaun bá relatóriu ezekuasaun OJE tinan 2025 no planu orsamentál tinan 2026 nian perante Deputadu no Deputada sira iha plenária PN, Sesta (17/10/2025).

Ministru “Oan Soru” atualiza katak, osan ne’ebé mak ko’a $30 kada fulan hahú hosi fulan-Janeiru tinan 2020 mai to’o iha fulan-Outubru 2025 nia montante total to’o ona Millaun $57 resin ($57.58.269,01).

Osan hirak ne’e tau iha konta depózitu iha Gabinéte Jestaun Fundo Investimento dos Veteranos (GJ-FIV) iha CCLN nia okos. Planu investimentu ida-ne’ebé governu investe ho utilizasaun hosi funu veteranus nian, ida mak harii ona Banco do Nosso Futuro (BNF). Tanba ne’e maka MAKLN ho CCLN hanoin hela atu oferese ka entrega sertifikadu asoens nian bá Veteranu no sira-nia família ne’ebé mak kontribui no partisipa ona iha FIV, uainhira fundu ne’e nia montante atinje ona Millaun Atus-ida ($100.000.000).

Bazeia bá Sesta-alterasaun hosi Dekretu-Lei númeru 15/2008, kona-bá Pensaun, hodi fó kompeténsia bá CCLN hasai deliberasaun ida, hodi prepara regulametu sira, atu jere no movimenta osan, fundu ida-ne’e.

Movimentasaun osan signifika, fundu Veteranus bele tau ka rai iha banku ne’ebé de’it ka bele jere osan ne’e liu-liu bá atividade ekonómiku sira, tanba osan ne’e hanaran fundu investimentu.

“Fundu ne’ebé ita ko’a ne’e hamutuk $57 milloens. Iha balu preukupa dehan, osan koa ne’e bainhira mak para. Sei para ka lae. La koalia kona-bá para totál. Maibé ita iha regulamentu ne’e hatete mós ida-ne’e. Retensaun bá Pensaun Kombatentes no Martirese libertasaun nasionál sei kontinua aplika, até atinje valór sein-milloens ($100 milloens),” Ministru “Oan Soru” hateten iha Plenária PN.

Fundu millaun $57 resin ne’e ho ninia funan hamutuk millaun $3 resin ($3.153.902,49). Nune’e uainhira soma millaun $3 resin ho millaun $57 resin, maka totál kapitál ne’ebé oras ne’e iha FIV, atinje ona dolar amerikanu millaun neen-nulu resin ($60.212.171,50).

“Ohin, ita-boot sira rona karik nia montante ne’e $57 milloens. Ho ninia jurus sira ne’e hotu mak hamutuk $60 milloens. Entaun, ita sura took, hela tán hira mak bele to’o $100 milloens ne’e presiza tán tinan hira. Ne’e bá públiku tomak bele sura ida-ne’e. Nia kuandu to’o $100 milloens ne’e ita atu halo saida. Nia kuandu to’o $100 milloens, iha buat rua mak tenke halo. Ida maka, fundu investimentu tenke hasai sertificado de ações ka sertifikadu saham, entrega bá nia na’in sira iha kraik. Ida seluk mak, CCLN bele liuhosi ninia politika hodi halo regulamentu seluk. Ko’a nafatin to’o iha ne’e de’it ka, redús ka oinsá. Ne’e fó sai mós iha jornal da republica,” dehan Ministru “Oan Soru”.

Hafoin entrega tiha Sertifikadu Asoens nian bá Veteranu sira, maka sira iha relasaun direta ho Gabinéte Fundu Investimentu Veteranus (G-FIV), la’os ho BNF, tanba G-FIV mak korte (ko’a) osan hodi hala’o atividade sira en-relasaun ho banku.

“Atinje $100 milloens, prepara ona sertificado de ações, entrega bá na’in, para na’in hatene ninia osan, ninia ações ne’e hira mak iha ne’ebá,” tenik “Oan Soru”.

Enkuantu, Kombantentes iha territóriu nasionál tomak hamutuk 11,451 mak durante ne’e kontribui kuota pursentu tolu-nulu (30%) bá iha FIV. Sira ne’e mós maka durante asesa hela kréditu osan iha banku sira ho montante osan hamutuk $67.420.989,79.

(Média G-MAKLN)