Press Release

Viqueque - Segunda-feira, 20 Outubru 2025 - Maske mosu dezentendimentu sira iha eskola ligadu ho estatutu eskola nian, Ministériu Edukasaun liuhosi Inspetór Jerál Edukasaun ne'ebé lidera husi Sub-Inspetór Jerál, núkleu, Administrasaun Eskolár Sr. Rodolfo Henrique Aparicio ho ekipa akompaña husi Superintendente Edukasaun Munisípiu nomós Komandante Eskuadra PNTL Postu Watulari koko hala'o mediasaun ho profesór/a, komunidade sira iha Eskola Ensinu Sekundária Jerál Daraloi-Iraler hodi realiza ezame nasionál ho hakmatek no kontroladu tanba hetan ameasa atu intervein ba ezame nasionál.

Hafoin halo mediasaun, Koordenadór ba realizasaun ezame nasionál no pasajen klase nian Sr. Agostinho da Costa do Rosario hatete, realizasaun ba ezame nasionál iha eskola ida-ne'e la'o ho hakmatek no kontroladu maske antes ne'e mosu dezentendimentu balun maibé hanesan Timoroan no funsionáriu públiku prontu atu koopera ho estadu hodi realiza ezame nasionál ho di'ak tanba estudante maka futuru nasaun nian.

"Totál Estudante ne'ebé maka partisipa iha ezame nasionál iha Eskola Ensinu Sekundáriu Jerál Daraloi-Iraler hamutuk nain-49 kompostu husi Siénsia teknolojia estudante hamutuk nain-21 no Siénsia Sosiais no Umanidade estudante hamutuk nain-28", Tenik Koordenadór Sr. Agostinho.

Responsavel ba realizasaun ezame nasionál no pasajen klase ne'e husu ba Ministériu Edukasaun liu-liu Diresaun Jerál Ensinu Sekundáriu nian atu bele hakbesik mai eskola ida-ne'e hodi fó solusaun ba estatutu eskola ida-ne’e nian tanba laiha solusaun ba estatutu maka sei afeta ba prosesu aprendizajen iha tinan oin.

#JornalistaEliasdaCosta

#MÉDIAME