Press Release

Manatuto-10/10/2025 Ministériu Agrikultura Pekuária Peska no Floresta (MAPPF) liu husi Diresaun Nasionál das Peska fo formasaun komunidade peskadór no vendedór sira hamutuk ema nain-20 durante loron haat (4) konaba prosesamentu ikan hodi diversifika ba ai-han.

Atividade ne’e hala’o iha Aldeia Ilimano Suku Uma Kaduak Postu Administrativu Laclo.

Iha entrevista Xefe Departementu Peska Munisipiu Manatuto, Sebatião Soares Pinto esplika, atividade formasaun ne’e foku liu ba iha oinsa halo prosesamentu ka diversifikasaun ikan fresku ba ai-han, nune’e nia valór ekonómiku ne’ebé diak hodi bele rai ba tempu naruk, atu nune’e bele konsume ho diak, hodi bele hakbi’it grupu sira ne’ebé mak halo sira-nia atividade hanesan vendedór iha area kosteru.

Nia hatutan, atividade ne’e pertinente tebes, oinsa bele hakbi’it komunidade sira nia koiñesementu atu halo prosesamentu ikan ba tempu naruk ho kualidade ne’ebé diak ba konsumidor sira.

Formasaun ne’e presiza tebes kada munisípiu sira ne’ebe partense ba iha área kosteru, atu bele hakbi’it no hasa’e koiñesementu ba peskadór sira nia familia ne’ebé halo sira atividade hanesan vendedór. Nune’e ba oin peskadór sira hetan ikan barak bele halo fali ba hahan seluk hanesan nugget, basso ikan, denden ikan, krupuk ikan, aboon ikan. Formasaun ne’ebé tekniku husi Diresaun Gerál Peska sira fo ne’e atu bele eleva koiñsementu peskadór no vendedór sira nia kapasidade.

“Atividade ne’ebé mak ami halo, depende tebes ba Diresaun Jeral peska liu husi Departementu Kapturasaun Post Kolleta mak realiza atividade prosesamentu ka diversifikasaun ikan nomós atividade sira seluk ne’ebé mak apoiu husi ajensia sira hanesan Blue Venture, worldfish ne’ebé mak halo hela atividade konaba tarabandu ka konservasaun tasi, husu atu atividade sira ne’e tenki kontinua ba oin atu bele muda komunidade sira nia koñesementu ka hasa’e kapasidade peskadór sira.

Tanba iha atividade balun envolve de’it ema ho númeru nato’on maibe ita hatene katak peskadór iha parte kosteru ne’e mós barak iha Manatuto iha kosta norte Manatuto Villa no kosta Súl Barique, hirak ne’e hotu nia área pontensialidade bo’ot tebes, entaun presiza mós atividade sira hanesan ne’e bebeik atu bele hakbi’it koñesementu ka kapasidade peskadór sira nian “.Tenik Xefe

Iha fatin hanesan staf tekniku husi Diresaun Nasionál Peskas liu husi Departementu Kapturasaun Pos-kolleta Esmeralda Maria da Costa Neto hateten, formasaun ne’ebé fo ba komunidade peskadór sira liga ba atividade ne’ebé mak sira fo hanesan; sanitasi no oinsa atu rai ikan iha tempu naruk nune’e nia kualidade diak no bele halo mós ba diversifika ba produtu ne’ebé diak. Sira mós hanorin konaba maneira oinsa atu halo ikan maran no bele halo mós ba nugget Krupuk Ikan, Ikan Baso no seluk tan.

Nune’e mós paritisipante Rosalia da Cunha informa, formasaun ne’ebé mak sira tuir hanesan hamer ikan maran, denden ikan maran, nugget ikan, oinsa atu rai ikan atu nune’e ikan bele iha kualidade diak nafatin atu bele halo ba produtu ikan ne’ebé diak.

Nia akresenta, Prosesu atu halo ikan fasíl tanba ikan ne’ebé mak tomak fera tiha hotu mak tau masin hoban durante 24 horas hafoin hasai no fase tiha mak bele habai, material ne’ebé mak sira uja hodi halo ikan ne’e, material tradisional hanesan masin baibain uja, no denden ikan sukaer ailia no ingridiente sira seluk tan, husi prosesamentu ikan ne’e fila fali ba sira ida-idak se hakarak negosiu bele mós faan hodi nune’e bele hetan osan bele sustenta ba nesesidade familia. Ekipa DMEA

Bele akonpaiha informasaun liu husi

Portal Official MAPPF

https://mappf.gov.tl/tl/news/