Press Release

17 Outubru 2025: Ministériu Saúde (MdS) liuhosi Diresaun Nasional Prevensaun Kontrolu Moras (DNPKM) hala’o sorumutu ho ofisiál Pontu Entrada sira durante loron 2 ho tema “Avalizasaun no Harmoniza Standar Operating Procedure (SoP) ba Implementasaun International Health Regulation (IHR-2005) ou Regulamentu Sanitáriu Internasionál, Iha Pontu Entrada (PE) Designadu, Iha Portu Baia Tibar.

Matéria hirak ne’ebé haktuir ba parsipantes sira durante loron 2 mak hanesan Introdusaun ba IHR-2005 no nia implementasaun iha Pontu Entrada iha Timor-Leste, Harmoniza SOP ba Pontus de Entrada Aeroportu, Portu no Fronteira Terrestres, Sosializasaun ba Formatu relatóriu Pontu Entrada ne’ebé integra ba Sistema EIS no M&E MdS, materia Basic Life Support no Table-Top-Exercice ba kazu Pandemia ruma.

Pontu Entrada Designadu 6 mak tama kritéria internasional mak hanesan Aeroportu Internasional Nicolau Lobato Comoro ho Profesionál Saúde hamutuk 5, Portu Dili 5, Portu Baia Tibar 3 no Fronteira Terrestres hanesan Batugede 2, Salele 3 no Sakato 2 mak daudaun ne’e destaka iha fatin refere.

“Implementasaun IHR 2005 hosi Estadu membru nu'udar parte ida hosi esforsu globál ida hodi prevene no responde ba ameasa saúde públiku sira, inklui pandemia, surtu moras infesiozu, no emerjénsia saúde públika internasionál sira.

IHR 2005 nian maka regulamentu saúde internasionál ne'ebé vinkula legalmente ba nasaun 196, inklui membru OMS hotu-hotu. Regulamentu sira ne’e ho objetivu atu hametin nasaun sira-nia abilidade atu deteta, avalia, relata, no responde ba ameasa saúde públika ne’ebé iha poténsia atu espalla globalmente,” hatete Ofelia M.O. do Carmo Responsavel Unidade Pontu Entrada-IHR.

Hodi hametin implementasaun IHR nian, hein katak nasaun sira iha mundu tomak bele preparadu di'ak liután atu hasoru ameasa sira saúde nian iha futuru no prevene repetisaun hosi impaktu boot sira ne'ebé esperiénsia durante pandemia COVID-19.

IHR mós trasa kapasidade sentrál espesífiku sira ne’ebé nasaun sira tenke dezenvolve ba sira-nia PE ne’ebé designadu (Aeroportu, Portu no Fronteira terrestre) hodi jere risku sira saúde púbika nian.

Kapasidade sira-ne’e krusiál atu detekta, avalia no hatan emerjénsia saúde públiku potensiál sira ne’ebé sai preokupasaun internasionál liuhosi estebelese medida sira vijilánsia no resposta nian ne’ebé loloos iha pontu entrada internasionál sira-ne’e.

#MídiaPalácioDasCinzas