Press Release

Díli, 09 Outubru 2025 – Governu Timor-Leste, liu husi Sekretaria Estadu ba Formasaun Profisionál no Empregu (SEFOPE), parseria ho Governu Australia liu husi programa eskema PALM , ofisialmente halo ona inaugurasaun ba Eskritoriu foun ba Diresaun Nasional Empregu Estranjeiru – Labour Sending Unit (DNE–LSU) iha City 8 Dili. Serimónia ida ne’e marka pasu importante iha esforsu kontinuidade entre Timor-Leste no Australia atu fortifika inisiativa programa mobilidade laboral iha Timor-Leste.Bazeia ba planu eskritoriu ida ne'e sei utiliza hanesan sentru operasional prinsipal ba DNEE-LSU.

Foku prinsipal liu mak atu halo jestaun partisipasaun Timor-Leste iha programa PALM inklui progama sira seluk hanesan Mobilidade Laboral Korea, Japan inklui Nova Zelandia.

Serimónia ida ne’e hetan partisipasaun direita husi Sua Exselénsia Sekretáriu Estadu SEFOPE, Rogério Araújo Mendonça L.Ed hamutuk ho delgasaun DNEE Lideradu husi Diretor Diresaun Nasional Empregu Estranjeiru , no representante husi Governu Australianu inklui parseiru servisu sira . Durante diskursu Ekselénsia Sekretáriu Estadu fo enfaze katak "Lori Governu Timor-Leste no SEFOPE nia naran, ha’u hakarak hato’o ami-nia agradesimentu sinseru no kle’an liu ba Governu Austrália no DFAT-PLMSP liuhosi Parseria PALM. Ita-boot sira-nia prezensa no ita-boot sira-nia investimentu iha Timor-Leste signifika bot tebes .

Ohin, ita selebra atinjimentu importante ida ne'ebé representa espíritu hosi ita nia akordu Bilaterál . Akordu ida-ne'e hanesan kompromisu ida ne'ebé klean ba futuru foin-sa'e sira-nian no dezenvolvimentu ekonómiku ita-nia Nasaun.

Ohin loron, ita hotu halibur hamutuk iha ne’e atu lansa ofisialmente Sentru PALM temporáriu .Edifísiu ida ne’e PLMSP-Austrália fó ho generosidade ba SEFOPE ba tempu tinan rua to’o tolu mai oin, sei funsiona hanesan sentru operasionál DNEE, enkuantu Sentru PALM permanente tuir planu sei konstrui iha tempu badak nia laran.

Edifísiu ne’e hanesan testemunia forte ne'ebé monstra ita nia kompromisu atu garante sustentabilidade program PALM raik. Obrigadu tanba fó fatin seguru, dedikadu no profisionál ba funsionariu sira atu servisu ba joven mane no feto Timoroan sira ho dignu no konfortavel liu.

Sekretariu Estadu mos akresenta katak "To'o ohin loron mobilizaun trabalaldor ba servisu iha Australia liu ona rihun 20,000 maioria husi trabalallador sira ne'e hetan ona fundus no esperiénsia ne’ebé útil atu sustenta sira-nia familia no dezenvolve komunidade. Ita nia desezu traballador sira hotu bele susesu liu husi programa moblidade laboral" Dehan Sua Ekselénsia Sekretáriu Estadu ba SEFOPE.

Governu Timor-Leste no Australia reafirma nafatin kompromisu atu asegura sustentabilidade programa PALM . Lansamentu Edifisiu ida foun ida ne’e la’ós deit marka atinjimentu operasional ida, maibé mos hanesan simbolu progresu kolektivu no esperansa atu hasae numeru partisipante traballador iha futuru.