Asuntu : 𝐆𝐨𝐯𝐞𝐫𝐧𝐮 𝐇𝐚𝐥𝐨 𝐋𝐚𝐧𝐬𝐚𝐦𝐞𝐧𝐭𝐮 𝐎𝐟𝐢𝐬𝐢𝐚𝐥 𝐎𝐩𝐞𝐫𝐚𝐬𝐢𝐨𝐧𝐚𝐥𝐢𝐝𝐚𝐝𝐞 𝐒𝐢𝐬𝐭𝐞𝐦𝐚 𝐀𝐫𝐞𝐚 𝐓𝐫𝐚𝐟𝐟𝐢𝐜 𝐂𝐨𝐧𝐭𝐫𝐨𝐥 𝐒𝐲𝐬𝐭𝐞𝐦𝐬, 𝐒𝐢𝐧𝐚𝐢𝐬 𝐒𝐨𝐧𝐨𝐫𝐮𝐬 𝐧𝐨 𝐏𝐚𝐫𝐚𝐳𝐞𝐧 𝐓𝐫𝐚𝐧𝐬𝐩𝐨𝐫𝐭𝐞 𝐏𝐮𝐛𝐥𝐢𝐤𝐮 𝐢𝐡𝐚 𝐊𝐚𝐩𝐢𝐭𝐚𝐥 𝐃𝐢𝐥𝐢 𝐃𝐈𝐋𝐈,𝟐𝟎/𝟏𝟎/𝟐𝟎𝟐𝟓:Governu liu husi Ministeriu Transporte no Komunikasaun, liu husi Diresaun Nasional Transporte Terestre (DNTT), realiza seremónia Lansamentu ofisial operasionalidade Sistema Area Traffic Control Systems (ATCS), Sinais Sonorus no Parajem Transportes Publikus iha Dili. Sistema ne’e lansa direita husi Vise-Primeiru Ministru, Ministru Koordenador ba Assuntus Sosiais, Eng. Mariano ASSANAMI Sabino, ne’ebe akompaña husi, Ministru Transporte Komunikasaun, Eng. Miguel Marques Gonçalves Manetelu, no Ministru Planeamentu Investimentu Estrateziku, Gastão de Sousa, iha Edifisiu DNTT, Balide, Dili. Iha Diskursu, Ministru Transportes no Komunikasoens, hatete, lansamentu Sistema ne’e ho objetivu sentral atu “Hari’i Sistema Transportes ne’ebe Seguru, Konfortavel, Inkluzivu no Modernu”. governu kompromete kontinua dezenvolve infraestrutura inklui sinalizasaun rodoviária, ne’ebé adekuada, no garante ba nia kumprimentu, iha País tomak. Ba áreas urbanas, sei kontinua hadi’a medidas ba jestaun tráfegu, atu bele responde ba situasoens espesífikas ne’ebé mosu. Ekipamentus ne’ebé inklui iha ATCS mak detetór ba klasifikasaun veíkulu, detetór ba numeru Plat/numeru registu veíkulu nian, relata informasaun “up to date” kona-ba movimentus no liu-liu fo relatoriu kompletu kona-ba movimentu no situasaun real iha terenu bainhira mosu “inkumprimentu ruma” ba regras tranzitu nian iha area sira ne’ebé Semáforus modernu nian instala. Entretantu, fasilidades hanesan lian Sonorus hatudu avansu ida ba inkluzividades ita nia sidadaun nian, wainhira ultra-pasa Estrada públikus, liu-liu Estrada sira ne’ebé movimentus veíkulus barak teb-tebes. Sei ajuda atu hatene tempu seguru atu atravesa no ajuda reduz asidente iha Estrada sira ne’ebé iha movimentu aas. Iha fatin hanesan, Vise-Primeiru Ministru, fo parabens ba ekipa ne’ebe hahu hanoin hodi dijitaliza Sistema trafegu ne’ebe bele kontrola kareta no motor sira ne’ebe halo operasaun iha Dili atu bele ordana di’ak liutan hodi hamenus asidente no engarafamentu. Husu ba DNTT atu servisu makas liutan bainhira sidadaun sira mai teste hodi hetan karta kondisaun tenke fo formasaun ne’ebe di’ak oinsa sira bele utiliza estrada publiku ho responsabilidade, respeitu nafatin sinais sira, respeita ema la’o ain sira nia direitu, liu-liu ba sira defisiensia ne’ebe uza kadeira roda no uza ai-tonka. Husu mos ba DNTT no Polisia Tranzitu sira atu kontinua kontrola kondutor sira atu nune’e haree taxi no bus sira ne’ebe la iha ona kondisaun atu halo operasaun hanesan tula pasajeiru tanba ne’e bele fo ameasa ba ema seluk nia vida, alende ne’e tenke alerta mos ba sira atu konduz kareta labele fula, hemu lanu.
Data Publica : 20 Oct 2025
Descrisaun :
