Asuntu : 𝐓𝐈𝐌𝐎𝐑-𝐋𝐄𝐒𝐓𝐄 𝐇𝐔𝐒𝐔 𝐏𝐀𝐑𝐒𝐄𝐈𝐑𝐔 𝐆𝐋𝐎𝐁Á𝐋 𝐒𝐈𝐑𝐀 𝐀𝐓Ú 𝐇𝐀𝐑𝐈'𝐈 𝐌𝐎𝐁𝐈𝐋𝐈𝐃𝐀𝐃𝐄 𝐈𝐍𝐓𝐄𝐋𝐈𝐉𝐄𝐍𝐓𝐄 𝐍𝐎 𝐈𝐍𝐊𝐋𝐔𝐒𝐈𝐕𝐔 𝐁Á 𝐅𝐔𝐓𝐔𝐑𝐔. Beijing, Xina, 16 Outobru 2025 Partisipa Konferénsia Mundiál kona-bá Veíkułu Intelijente Konektadu (ICV) ne'ebé hala’o iha Beijing, Ministru Transporte no Komunikasaun, 𝐄𝐧𝐠.𝐌𝐢𝐠𝐮𝐞𝐥 𝐌𝐚𝐫𝐪𝐮𝐞𝐬 𝐆𝐨𝐧ç𝐚𝐥𝐯𝐞𝐬 𝐌𝐚𝐧𝐞𝐭𝐞𝐥𝐮, hato’o nia diskursu hodi husu kolaborasaun globál atú mellora sistema mobilidade intelijente, sustentável no inklusivu bá nasaun dezenvolvimentu sira. Iha Sesaun Meza-redonda kona-bá Polítika Indústria ICV nian ne’ebé modera husi Vise-Ministru bá Indústria no Informasaun Teknolójia Xina, 𝐗𝐢𝐧 𝐆𝐮𝐨𝐛𝐢𝐧, Ministru Manetelu iha nia diskursu afirma Timor-Leste iha vizaun atu integra infraestrutura transporte no rede dijitál iha programa dezenvolvimentu nasionál. Governante ne’e hatutan katak ICV la’ós de'it inovasaun teknolójika maibé xavi bá estrada ida mais seguru, ambiente verde no ekonomia ne'ebé efisiente liu. Ministru Manetelu argumenta katak Timor-Leste aprezenta vantajen úniku ne’ebé permite atú hari'i ekosistema mobilidade integradu husi inisíu. "Ami iha estájiu dahuluk bá ami-nian transformasaun dijitál nasionál no ida ne'e permite ami atú dezeña futuru ho objetivu klaru" nia argumenta. Ministru Manetelu reafirma Estratéjia Governu Timor-Leste nian bá ICV hola parte iha pilar rua mak hanesan: 𝐈𝐧𝐟𝐫𝐚𝐬𝐭𝐫𝐮𝐭𝐮𝐫𝐚 𝐈𝐧𝐭𝐞𝐠𝐫𝐚𝐝𝐮 𝐧𝐨 𝐑𝐞𝐠𝐮𝐥𝐚𝐦𝐞𝐧𝐭𝐮 Prospetivu. Ministru Manetelu hatete Governu Timor-Leste afirma pozisaun iha konferénsia ne’e katak nasaun nian dalan bá mobilidade intelijente sei prioriza inkluzividade no benefísiu sosiál. "Ami-nia tranzisaun bá mobilidade intelijente sei hala'o kuidadu ho kompromisu bá dezenvolvimentu sosiadade tomak no ami sei asegura katak benefísiu husi transformasaun ida ne'e bá lójistika, transporte públiku, ka mobilidade pessoál sei dezeña ho sentidu atu fó benefisiu bá sidadaun hotu, husi nasionál to'o bá komunidade sira iha área remotas."tenik Ministru Manetelu. Iha biban ne’e, Ministru Manetelu hato’o konvite bá kolaborasaun bá parseiru sira hanesan peritu governu, empreza teknolojia no investidór sira. Iha nia diskursu ikus Ministru Manetelu kompremetidu Timor-Leste nia determinasaun atu hari'i "nasaun ida ne'ebé konektadu, dezeñu bá prosperidade povu nian no planeta ida saúdavel. "Ami hanesan nasaun joven ida ne'ebé ansiozu atu abraza futuru modernu," nia dehan. "Ami fiar katak mobilidade nian futuru tenke inklusivu no ami konvida lider industria ICV vizita Timor-Leste hodi dezenvolve solusaun ne'ebé propria bá realidade ekonomia nasaun dezenvolvimentu sira nian, hodi lori solusaun bá ema proximu biliaun iha mundu." Tenik Ministru Manetelu. 𝐌é𝐝𝐢𝐚 𝐌𝐓𝐊
Data Publica : 21 Oct 2025
Descrisaun :
