Asuntu : MINISTRU PREZIDÉNSIA KONSELLU MINISTRUS APREZENTA PROPOSTA ORSAMENTÁL BA TINAN 2026 IHA AUDIÉNSIA PÚBLIKA HO PARLAMENTU NASIONÁL Ministru Prezidénsia Konsellu Ministrus, Agio Pereira, hala’o sorumutu, iha loron 21 fulan-outubru tinan 2025, ho membrus Komisaun A Parlamentu Nasionál nian, ne’ebé responsavel ba matéria konstitusionál no justisa, iha ámbitu audiénsias públikas ba apresiasaun inisiál hosi proposta orsamentál Prezidénsia Konsellu Ministrus nian ba tinan 2026. Proposta orsamentál Prezidénsia Konsellu Ministrus nian ba tinan 2026 ho valór totál dolar amerikanu millaun 4,9, destina ba finansiamentu programa rua no subprograma hitu. Programa Polítika Estratéjika Nasionál, ho orsamentu dolar amerikanu millaun 2,09, kobre área sira hanesan apoiu ba Primeiru-Ministru iha koordenasaun serbisu governu nian, governasaun legál, tradusaun jurídika, polítikas públikas, komunikasaun estratéjika no asuntus parlamentares. Programa Funsionamentu no Dezenvolvimentu Institusionál, ho montante dolar amerikanu millaun 2,8, asegura funsionamentu administrativu no dezenvolvimentu organizasionál instituisaun nian. Orsamentu ne’e mós inklui dolar amerikanu millaun 3,1 ba saláriu no vensimentu, dolar amerikanu millaun 1,77 ba beins no servisus no dolar amerikanu rihun 50 ba despezas kapitál menór. Iha sorumutu ne’e, Ministru, ne’ebé akompaña husi dirijentes instituisaun nian, aprezenta prioridades prinsipais Prezidénsia Konsellu Ministrus nian ba tinan 2026, foka liu ba apoiu Primeiru-Ministru iha koordenasaun serbisu governu, governasaun legál Konsellu Ministrus nian, koordenasaun polítikas públikas estratéjikas, komunikasaun estratéjika Governu no promosaun sidadania, nune’e mós akompañamentu matérias ne’ebé iha debate Parlamentu Nasionál no asaun fiskalizasaun parlamentár relasiona ho preokupasaun no nesesidade populasaun nian. Kona-ba ezekusaun, iha tinan 2024 atinje 87,8% no, iha tinan 2025, to'o agora, atinje ona 81,5%. Hafoin audiénsias públikas, Orsamentu Jerál Estadu ba tinan 2026, ne'ebé fiksa ho dolar amerikanu biliaun 2,291, sei diskute iha jeneralidade husi loron 5 to’o 7 fulan-novembru, tuir fali ho diskusaun iha espesialidade, hahú husi loron 10 fulan-novembru, no votasaun finál globál to'o loron 24 fulan-novembru.
Data Publica : 22 Oct 2025
Descrisaun :
