Asuntu : SEKRETÁRIU ESTADU ESJ-ESTV ABERTURA EZAME NASIONÁL TINAN 2025 IHA ESKOLA SEKUNDÁRIA JERÁL PÚBLIKA BAQUI Oe-Cusse, segunda-feira loron 20 fulan Outubru 2025 - Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos akompaña husi Prezidente Autoridade Rejiaun Administrativa Espesiál Oe-Cusse Ambeno Sr. Régio da Crus Salu, Diretór Rejionál Edukasaun Asuntu Sosiál Sr. Vincencio Cono, komandante Polísia no Dirijente Ministériu Edukasaun nia, halo abertura ba ezame nasionál tinan 2025 iha eskola Sekundáriu Jerál Públika Baqui Oe-Cusse. Iha entrevista, Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, hateten, ohin iha nivél nasionál tomak realiza ona ezame nasionál ba Ensinu Báziku 3⁰ Siklu 9⁰ ano, 12⁰ ano Ensinu Sekundáriu Jerál no ESTV, espera katak prosesu ezame ne'e la'o di'ak to'o remata. "Ohin ita haree prosesu tama aula laran di'ak tebetebes, espera katak loron tolu ne'e bele hatudu resultadu ne'ebé di'ak. Ha'u hanoin estudante hotu-hotu prepara-an hodi tuir ezame nasionál", dehan Sekretáriu Estadu. Governante ne’e mós husu ba Profesór sira atu halo vijilásia ho di'ak. Tanba estudante partisipa prosesu aprendizajen durante tinan tolu, ohin habadak ba loron tolu, signifika katak loron tolu mak deside estudante sira nia futuru, estudante sira atu susesu presiza ita hotu nia kontribuisaun. Hafoin halo abertura Ezame Nasionál iha eskola Sekundáriu Jerál Públika Baqui, Sua Exelénsia Sekretáriu Estadu ho ekipa kontinua observa direta ba ezame nasionál iha Eskola Ensinu Báziku 3⁰ Siclo Tula-Ica Aenmat. Eskola Sekundária Jerál Públika Baqui estudante hamutuk na'in 214, EBC Tula-Ica Aenmat Estudante hamutuk na'in 95, mak dadaun ne'e partisipa hela ezame nasionál ba tinan letivu 2025.
Data Publica : 22 Oct 2025
Descrisaun :
