Asuntu : 𝐊𝐎𝐍𝐒𝐄𝐋𝐋𝐔 𝐌𝐈𝐍𝐈𝐒𝐓𝐑𝐔 𝐀𝐔𝐓𝐎𝐑𝐈𝐙𝐀 𝐌𝐈𝐍𝐈𝐒𝐓𝐑𝐔 𝐌𝐀𝐍𝐄𝐓𝐄𝐋𝐔, 𝐀𝐒𝐈𝐍𝐀 𝐌𝐄𝐌𝐎𝐑𝐀𝐍𝐃𝐔 𝐄𝐍𝐓𝐄𝐍𝐃𝐈𝐌𝐄𝐍𝐓𝐔 𝐈𝐃𝐀 𝐄N𝐓𝐑𝐄 𝐆𝐎𝐕𝐄𝐑𝐍𝐔 𝐑𝐃𝐓𝐋 𝐍𝐎 𝐆𝐎𝐕𝐄𝐑𝐍𝐔 𝐌𝐀𝐋Á𝐙𝐈𝐀 𝐊𝐎𝐍𝐀-𝐁Á 𝐊𝐎𝐎𝐏𝐄𝐑𝐀𝐒𝐀𝐔𝐍 𝐈𝐇𝐀 Á𝐌𝐁𝐈𝐓𝐔 𝐓𝐄𝐋𝐄𝐊𝐎𝐌𝐔𝐍𝐈𝐊𝐀𝐒𝐎𝐄𝐍𝐒. Dili, 22 Outubru 2025 Governu liuhosi reuniaun Konsellu Ministrus ne’ebé hala’o iha Palásiu Governu, Dili, ohin delibera hodi autoriza Ministru Transporte no Komunikasaun, ENG.Miguel Marques Gonçalves Manetelu, asina Memorandu Entendimentu ida entre Governu Repúblika Demokrátika Timor-Leste no Governu Malázia kona-bá kooperasaun iha ámbitu telekomunikasoens. Memorandu Entendimentu ne’e ho objetivu atu hametin kooperasaun bilaterál iha setór telekomunikasoens, ne’ebé kobre infraestrutura, servisus no asuntus regulatórius, bazeia bá resiprosidade no benefísiu mútuu. Entre área prinsipál sira kooperasaun nian mak interkámbiu koñesimentu tékniku no prátika di'ak, kapasitasaun institusionál, promosaun peskiza no inovasaun teknolójika no mós fasilitasaun parserias entre entidade reguladora, operadór no ajente sira setór ne’e nian husi nasaun rua ne'e. Akordu ne’e mós preve programa formasaun, workshop no interkámbiu tékniku, hodi kontribui bá dezenvolvimentu setór telekomunikasoens ne’ebé modernu, seguru no efisiente liu, ne’ebé esensiál bá progresu ekonómiku no prosesu integrasaun rejionál Timor-Leste nian iha espasu ASEAN. 𝐌é𝐝𝐢𝐚 𝐌𝐓𝐊
Data Publica : 23 Oct 2025
Descrisaun :
