Asuntu : DIRETORA DNDIJ-SEI HMAUTUK HO REPREZENTANTE PAM DILI, NO PREZIDENTE AFEMDIL HALO ABERTURA BA IHA SEREMÓNIA FORMASAUN KONA-BA HAKBI’IT FETO IHA VIDA EKONOMIA FAMÍLIA. Dili, 15-10-2025-- Diretora DNDIJ-SEI, Sra. Olga da Costa Monteiro, hamutuk ho Reprezentante Prezidente Autoridade Munisípiu (PAM) Dili, Sekretária Asuntu Sosiais, Sr. Tomas Barros, no Prezidente Asosiasaun Feto Munisípiu Dili (AFEMDIL), Sra. Salustiana Maria da Costa Simões, hala’o abertura ba iha Seremónia Formasaun kona-ba Hakbiit Feto iha Vida Ekonomia Família, ne’ebé mak organiza husi Asosiasaun Feto Munisípiu Dili (AFEMDIL), iha Salaun Enkontru Munisipál Dili. Objetivu husi Formasaun refere, mak atu hasa’e koñesimentu Feto ho Potensialidade no Grupu Feto sira iha Munisípiu Dili, kona-ba atu hakbi'it kuñesimentu feto iha vida ekonómia família hodi nune'e bele halo jestaun di’ak liután ba iha sira-nia grupu rasik ne’ebé mak hetan ona Fundus Transferénsia Públika husi SEI. Diretora DNDIJ-SEI, Sra. Olga da Costa Monteiro, iha nia intervensaun hatete, Sekretaria Estadu ba Igualdade, hato’o parabens ba Asosiasaun Feto Munisípiu Dili (AFEMDIL) tanba iha inisiativa di’ak atu fó formasaun no Kapasita feto sira iha área Hakbi’it Ekonómia. Atividade ne’e, hanesan prova konkretu katak feto sira iha Munisípiu Dili no iha Timor-Leste kompletu la’o ba Frente ho laran forte, ho motivasaun atu partisipa ativa iha dezenvolvimentu iha sosiu-ekonómiku nasaun, Feto sira labele de’it hetan apoiu morál, maibé presiza asesu ba kapasidade informasaun no mekanizmu atu sustenta sira-nia família, apoiu iha grupu laran no komunidade. Formasaun iha área ekonómiku mak instrumentu ne’ebé feto bele uza atu sai independente, aumenta sira-nia konfiansa, no bele fó desizaun ba sira-nia lian no atividade hanesan ne’e bele ajuda feto sira hahú sira-nia negósiu rasik, dezenvolve produtu lokál aumenta renda família no fó esperansa ba labarik sira atu hetan futuru di'ak liu. Seremónia Formasaun no Kapasitasaun refere, hala’o durante loron rua, no sei fasilita husi Ekipa IADE ne’ebé mak sei fahe matéria kona-ba akuntabilidade, no formasaun refere partisipa husi reprezentante husi Administradór Postu Nain Lima (5), Membru Asosiasaun Feto Munisípiu Díli husi Postu lima (5), no Grupu Feto Potensiál husi Munisípiu Dili. #Média-SEI# Fontes: https://www.facebook.com/share/p/19ruQqpZQ5/
Data Publica : 24 Oct 2025
Descrisaun :
