Asuntu : SORUMUTU KONSELLU MINISTRUS OHIN, APROVA ONA PROJETU DEKRETU LEI BA KRIASAUN LIÑA SOLIDARIA ATENDE KAZAU VBJ NO VIOLÉNSIA HASORU FETO NO FOIN-SA’E SIRA Dili; 22 Outubru 2025_____ Enkontru Konsellu ministrus nian, ne’ebe realiza iha palásiu Governu, Dili Ohin, halo ona aprovasaun ba Projetu Dekretu Lei ne’ebé aprezenta husi Vise-Ministra Solidariedade Sosiál no Inkluzaun, Céu Brites kona-ba hodi kria Liña Solidária atu atende kazu violénsia bazeia ba jéneru no violénsia hasoru labarik no foin-sa’e sira. Liña Solidária maka servisu gratuitu no konfidensiál ne’ebé disponivel oras 24 nia laran, ne’ebé dezeña atu fornese kanál resposta imediata ba situasaun violénsia, hodi garante vítima sira asesu ba apoiu psikolójiku, sosiál, legál no institusionál. Mekanizmu foun sei jere hosi Ministériu Solidariedade Sosiál no Inkluzaun no sei servisu hamutuk ho ministérius, autoridades munisípiu sira no parseirus dezenvolvimentu balun, ho objetivu atu hametin protesaun ba vítima no koordenasaun entre servisu emerjénsia, seguransa, saúde no justisa. Númeru úniku 116 sei asesivel hosi kualkér rede nasionál telekomunikasaun nian, ne’ebé permite enkamiñamentu lalais kazu sira no ativasaun imediata ba meius resposta nian iha situasaun sira ho risku ameasa ne’ebé atu akontese. Nune’e mos iha sorumutu ohin konsellu Ministru mos delibera hodi autoriza Ministru Transportes no Komunikasoins, Miguel Marques Gonçalves Manetelu, asina Memorandu Entendimentu ida entre Governu Repúblika Demokrátika Timor-Leste no Governu Malázia kona-ba kooperasaun iha ámbitu telekomunikasoins. Memorandu Entendimentu ne’e ho objetivu atu hametin kooperasaun bilaterál iha setór telekomunikasoins, ne’ebé kobre infraestrutura, servisus no asuntus regulatórius, bazeia ba resiprosidade no benefísiu mútuu. Konsellu Ministrus aprova mós Projetu lei sira seluk mak hanesan: - projetu Dekretu-Lei, ne’ebé aprezenta husi Ministra Edukasaun, Dulce de Jesus Soares, kona-ba Rejime Exepsionál ba Promosaun Bazeia ba Antiguidade hosi Funsionáriu sira ne’ebé Integra iha Karreira Dosente. - Konsellu Ministrus aprova projetu Proposta Lei, ne’ebé aprezenta husi Ministru Prezidénsia Konsellu Ministrus, Agio Pereira, kona-ba Rejime Jerál Kontraordenasoins. - Ikusliu, projetu Rezolusaun Governu kona-ba konsagrasaun loron 5 fulan-juñu nu’udar Loron Nasionál Tasi, ne’ebé aprezenta husi Primeiru-Ministru Kay Rala Xanana Gusmão hetan aprovasaun, ne’ebé dedika hodi selebra no prezerva tasi no biodiversidade tasi iha Timor-Leste, no mós hala’o atividade sira ho objetivu atu promove nia valór no promove partisipasaun ativa sosiedade nian, liuliu labarik no foin-sa’e sira, iha ninia protesaun. # Media SEI# Fontes: https://www.facebook.com/share/p/16EHwbq2Gm/
Data Publica : 24 Oct 2025
Descrisaun :
