Asuntu : SEI AUDENSIA PÚBLIKA HO KOMISAUN F PARLAMENTU NASIONÁL KONA-BA EZEKUSAUN ORSAMENTU JERÁL ESTADU SEI NIAN BA TINAN 2025 NO ATRIBUISAUN ORSAMENTU JERAL ESTADU BA SEI TINAN 2026 Dili, 23 fulan-outuburu tinan 2025—Sua Exelénsia Sekretária Estadu ba Igualdade (SEI), Sra. Elvina Sousa Carvalho, akompaña husi Diretór-Jerál-SEI, Sr. Armando da Costa, Xefe Gabinete-SEI, Sra. Angelina Maschado de Jesus no kargus Diretores Nasionais no téknika sira inklui Asesor/a husi SEI, hala’o Audiénsia Públika ho Prezidente Komisaun F Parlamentu Nasionál ne’ebé trata Asuntu Saúde, Seguransa Sosiál no Igualdade Jéneru, Distinta Deputada, Sra. Maria Gorumali Barreto, hamutuk ho Vise Prezidente Komisaun F, Distintu Deputadu, Sr. Luís Ximenes Caldeira, no Membru Komisaun F sira mak hanesan, Distinta Deputada Sra, Lusia Taeki, Distinta Deputada, Sra. Maria Teresa da Silva Gusmão no Sra. Helena Martins Belo, iha sala GMPTL Parlamentu Nasionál, Díli. Audiénsia Públika ne’e hala’o hodi aprezenta progresu ezekusaun Orsamentu Sekretaria Estadu ba Igualdade (SEI) tinan 2025 to’o iha trimestrál datoluk no atinjimentu ezekusaun ne’ebé sei halo tan to’o iha tinan ne’e nia remata no aprezentasaun Planu Asaun Anuál no Orsamentu SEI nian ne’ebé planeia ona ba tinan 2026. Sua Exelénsia Sekretaria Estadu ba Igualdade (SEI), Sra. Elvina Sousa Carvalho, iha nia aprezentasaun hatete katak alokasaun OGE tinan 2025 ne’ebé atribui mai SEI hamutuk $1,835,595.00 ninia ezekusaun atinje ona 70% ho nia kategoria sira mak hanesan Salariu e Vensimentu: $919,350.00 atinje ona 73%; Bens e Serviços Correntes: 716.245.00 atinje ona 69%; no Transferências Públicas: $200,000.00 atinje ona 59%. Hafoin aprezentasaun ba iha progresu ezekusaun ba OGE-SEI tinan 2025, Sua Exelénsia aprezenta mós Orsamentu Jerál Estadu ne’ebé atribui mai SEI iha tinan 2026. Exelénsia haktuir katak totál orsamentu ne’ebé atribui hamutuk $1,348,664.00 ho nia kategoria sira mak hanesan Salariu Vensimentu, $771, 480.00, Beins no Servisu Korrentes, $550,000.00 no Kapitál Minor $ 20,000.00. Orsamentu ne’e sei sustenta Programa 2, SubPrograma 9 no Atividades 20 ne’ebé SEI sei implementa iha tinan 2026. Iha Orsamentu Jerál Estadu ne’ebé atribui ba SEI iha tinan 2026 iha redusaun maka’as hamutuk $486,931 ka 27% kompara ho tinan 2025 nian. Sua Exelénsia Sekretária Estadu ba Igualdade, Sra. Elvina Sousa Carvalho hatete katak ho redusaun atribuisaun orsamentu mai SEI sei fó implikasaun ba iha implementasaun SEI nian iha tinan oin liuliu Fundus Transferénsia Públiku (FTP) ne’ebé la aloka ba tinan oin. Ida-ne’e sei fó implikasaun ba iha advokasia no apoiu Grupu Feto sira no Organizasaun Sosiedade Sivíl ne’ebé sai hanesan parseiru prinsipál SEI nian hodi fornese formasaun no apoiu vítima husi violénsia sira. Prezidente Komisaun F Parlamentu Nasionál, Distinta Deputada Sra. Maria Gorumali Barreto hamutuk ho membru Komisaun F hato’o apresiasaun ba Ezekusaun SEI nian to’o iha fulan ida-ne’e ne’ebé atinje ona 70% no hato’o ninia preukupasaun mós ba iha redusaun orsamentu SEI nian iha tinan 2026 liuliu relasiona ho Fundu Transferénsia Públiku no servisu atendimentu ne’ebé Pontu Fokál Munisípiu no postu sira halo hodi kontinua servisu maka’as ba promosaun igualdade jéneru no inkluzaun iha munisípiu, postu, suku no área rurál. Prezidente Komisaun F Parlamentu Nasionál, Distinta Deputada Sra. Maria Gorumali Barreto subliña hodi afirma katak Komisaun F sei halo esforsu oinsá maka bele buka dalan hodi haforsa preukupasaun sira ne’e iha diskusaun sira tuirmai. #Média SEI# Fontes: https://www.facebook.com/share/p/1F5cRVFmKy/
Data Publica : 24 Oct 2025
Descrisaun :
