Asuntu : 𝐕𝐢𝐬𝐞-𝐏𝐫𝐢𝐦𝐞𝐢𝐫𝐮 𝐌𝐢𝐧𝐢𝐬𝐭𝐫𝐮 𝐇𝐚𝐥𝐨 𝐀𝐛𝐞𝐫𝐭𝐮𝐫𝐚 𝐀𝐤𝐚𝐦𝐩𝐚𝐦𝐞𝐧𝐭𝐮 𝐈𝐧𝐭𝐞𝐫𝐧𝐚𝐬𝐢𝐨𝐧𝐚𝐥 𝐉𝐮𝐯𝐞𝐧𝐭𝐮𝐝𝐞 𝐏𝐞𝐫𝐦𝐚𝐤𝐮𝐥𝐭𝐮𝐫𝐚 𝟐𝟎𝟐𝟓 𝐄𝐫𝐦𝐞𝐫𝐚,𝟐𝟏/𝟏𝟎/𝟐𝟎𝟐𝟓:Vise-Primeiru Ministru, Ministru Koordenador ba Assuntus Sosiais, Eng. Mariano ASSANAMI Sabino, reprejenta Xefe Governu, Kay Rala Xanana Gusmão halo abertura ba Akampamentu Internasional Juventude Permakultura, ne’ebe Timor-Leste mak sai uma nain ba eventu refere iha tinan 2025, ne’ebe hala’o iha Aldeia Kaitarahei, Suku Fatukeru, Postu Administrativu Rai-Laku, Munisipiu Ermera. Eventu ne’e partisipa husi delegadu sira husi Nasaun 12 mai Fatukeru Ermera, sentro ba Timor-Leste nia futuru Agrikultura hodi Rekuñese Permatil nia knar hodi transforma movimentu lokal ida ba Plataforma global ba mudansa. Eventu ne'e ho tema, "Kuda Bee, hamoris komunidade sira," ne'e hanesan resposta diretu no estratejiku ida ba ita nia nasaun nia vulnerabilidade boot ba mudansa klimatika no ita nia nesesidade atu dezenvolve soberania ai-han no sustentabilidade ambiental ba longu prazu. Potensia Demografika, Timor-Leste nia joven maka hanesan xave ba reziliensia nasional, maibe potensia ida ne'e presiza dinamiza. Dadauk ne'e iha joven barak mak klasifika hanesan la iha servisu, la tama eskola la tuir treinamenu ruma (Not in Employment, Education, or Training - NEET). Agrikultura hanesan dalan ida atu kore potensia ne'e. Modernizasaun setor agrikola, ita tenki muda ema nia persepsaun kona-ba agrikultura, atu muda sektor ne'e hanesan sektor modernu, sientifiku no lukrutivu atu atrai joven sira no prevene joven sira labele mai hotu iha sidade. Eventu ne’e iha opportunidade Ekonomika, Relatoriu Hafoun hatudu katak implementasaun metodu agrikultura reziliente iha potensia atu hasa’e kolleta 60% no fo rendimentu U$ millaun 133 ba família agrikultor hamutuk rihun 190. Rejime Rai nian no Finansiamentu, Governu rekuñese katak presiza iha serteza juridika kona-ba rai no propriedade atu ema bele uza rai hanesan kolateral ba hetan imprestimu husi banku. Nune'e mos, presiza iha skema husi banku sira atu fo finansiamentu (emprestimu) espesifiku ba agrikultor sira ne'ebe preseiza hetan emprestimu. Konvite ba parseria, Konvida parseiru internasional sira la’os mai atu haree de’it dezafiu sira ne'ebe Timor-Leste hasoru, maibe mos atu haree no apreende husi susesu sira hanesan Permatil hatudu no servisu hamutuk atu halo susesu ne'e sai boot liu tan. Vizaun ba Oin: IPYC 2025 hanesan oportunidade ida ba joven sira atu hamentin rede kolaborasaun husi Joven Mahein Ambiental (young environmental stewards) no afirma katak Timor-Leste foin mak hetan ninia independensia loloos bainhira joven sira hetan kbi'it atu garante ninia futuru ekonomiku, sosial no ekolojiku.
Data Publica : 27 Oct 2025
Descrisaun :
