Asuntu : 𝐌𝐈𝐍𝐈𝐒𝐓𝐑𝐔 𝐌𝐀𝐍𝐄𝐓𝐄𝐋𝐔 𝐄𝐍𝐊𝐎𝐍𝐓𝐑𝐔 𝐇𝐎 𝐆𝐎𝐎𝐆𝐋𝐄 𝐁Á 𝐓𝐑𝐀𝐍𝐒𝐅𝐎𝐑𝐌𝐀𝐒𝐀𝐔𝐍 𝐃𝐈𝐉𝐈𝐓Á𝐋. Kuala Lumpur - Malázia, 26 Outubru 2025 Iha pasu signifikativu ida atu promove transformasaun dijitál Timor-Leste nian, Ministru Onoravel Transporte no Komunikasaun, Eng.Miguel Marques Goncalves Manetelu hala'o sorumutu produtivu ho Vise-Prezidente Asuntu Governu no Politika Publika Google nian, Sr.Wilson White, iha Kuala Lumpur Malázia. Enkontru ne’e serve atu loke diálogu ida ne’ebé diretu no konstrutivu, ho Ministru Manetelu trasa vizaun klaru Timor-Leste nian atu harii nasaun ida ne’ebé iha ligasaun, alfabetizadu dijitál no siber-seguru. Nia destaka investimentu konkretu governu nian iha infraestrutura dijitál, hanesan Kabel Submarinu Súl Timor-Leste foun (TLSSC) no subliña importánsia hosi parseria estratéjiku sira hodi aliña ambisaun nasionál sira ho perísia globál bá benefísiu mútuo. Durante diskusaun, Wilson White hato'o nia apresiasaun bá oportunidade atu envolve ho Ministru. Nia afirma kompromisu Google nian hodi servisu besik ho Governu Timor-Leste liuhosi Ministériu Transporte no Komunikasaun (MTC) hodi avansa implementasaun área xave sira ne'ebé identifika ona iha tempu badak. Rezultadu xave ida husi enkontru ne'e maka Wilson White nia akordu atu kontinua diskusaun tékniku sira ne'ebé kle'an kona-bá área parseria xave sira ne'ebé aprezenta husi Ministru Manetelu. Área sira-ne'e inklui : • Harii Kapitál Umanu: Habelar programa ‘Google Career Certificates’ hodi kria pipeline talentu dijitál kualifikadu iha Timor-Leste. • Hakbi’it Kriadór Lokál sira: Estabelese ‘YouTube Creator Lab Timor-Leste’ hodi treinu no fó apoiu bá kriadór konteúdu lokál sira. • Hasa'e Infraestrutura: Esplora solusaun sira ‘Asesu Google’ bá komunidade sira ne'ebé dook no ‘Google Cloud’ bá ambisaun sira governu eletróniku nasaun nian iha parseria ho TIC TIMOR. • Hametin Kapasidade Nasionál sira: Kolabora iha siberseguransa no Intelijénsia Artifisiál (IA). Wilson White subliña importánsia husi literasia dijitál no dezenvolvimentu konteúdu lokál nu'udar fundamentál bá ekonomia dijitál inkluziva ida. Atu asegura progresu tangivel, nia konfirma katak nia sei fó instrusaun bá ekipa Jakarta husi Google atu kolabora besik ho ekipa tékniku sira iha MTC kona-bá pasu sira tuir mai ho implementasaun potensiál bá projetu sira ne'ebé alvu bá tinan 2026. Envolvimentu ida-ne'e marka momentu importante ida iha parseria entre Timor-Leste no Google, hodi loke dalan bá esforsu kolaborativu sira ne'ebé sei fó kbiit bá sidadaun Timor-oan sira, promove inovasaun no aselera futuru dijitál nasaun nian. Média MTK
Data Publica : 28 Oct 2025
Descrisaun :
