Asuntu : 𝐓𝐈𝐌𝐎𝐑-𝐋𝐄𝐒𝐓𝐄 𝐎𝐅𝐈𝐒𝐈𝐀𝐋𝐌𝐄𝐍𝐓𝐄 𝐒𝐀𝐈 𝐌𝐄𝐌𝐁𝐑𝐔 𝐀𝐒𝐄𝐀𝐍 𝐁Á 𝐃𝐀𝐋𝐀 𝟏𝟏. Dili, 26 Outbru 2025 Governu hamutuk ho povu Timor-Leste selebra adezaun Timor-Leste bá Membru ASEAN bá dala 11, Serimónia Komemorativa Nasionál ne’ebé hala’o iha Largo Lecidere, organiza husi Ministériu Administrasaun Estatál (MAE) ho Ministériu Negósiu Estranjeiru no Kooperasaun (MNEK) no Munisípiu Dili, hodi selebra momentu istóriku Timor-Leste nia admisaun nu’udár Estadu Membru bá dala-11 husi Asosiasaun Nasaun sira Sudeste Aziátiku nian (ASEAN). Selebrasaun ne'e hahú iha tuku 5:30 lokraik, iha ne’ebé reprezentante sira husi Governu, Órgaun soberanu sira, Korpu diplomátiku, Ajénsia internasionál, Konfisaun relijioza, F-FDTL no PNTL, Veteranu, Organizasaun sosiedade sivíl, Líder komunitáriu, Estudante no Sidadaun sira halibur hamutuk hodi asiste no selebra eventu importante ida-ne’e iha istória nasaun nian. Selebrasaun ne’e hala’o mós iha munisípiu 12, Autoridade Administrativa Atauro no Rejiaun Administrativa Espesiál Oecusse-Ambeno (RAEOA). Iha diskursu, Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Eng.𝐌𝐚𝐫𝐢𝐚𝐧𝐨 𝐀𝐬𝐬𝐚𝐧𝐚𝐦𝐢 𝐒𝐚𝐛𝐢𝐧𝐨, hateten, Ohin ita marka momentu istóriku ida ne’e, momentu ida ne’ebé povu Timor-Leste durante tinan barak hein ho esperansa, pasiénsia no determinasaun. “Husu bá ema hotu, liu-liu ita-nia juventude, atu kontinua involve-an iha prosesu ida-ne’e. Timor-Leste membru ASEAN, maibé ASEAN mós iha Timor-Leste, iha ita-nia hanoin, iha ita-nia moris no iha ita-nia esperansa”. Dehan Vise-Primeiru-Ministru, Eng.Mariano Asanami Sabino. Malázia fó apoiu bei-beik bá Timor-Leste nia aspirasaun atu adere bá ASEAN “Kompromisu ida ne’ebé ami reafirma fila fali ohin dadeer, hanesan ami halo ona dala barak antes, inklui durante Vizita Ofisiál husi ha’u-nia Primeiru-Ministru, Honorável Dato’ Seri Anwar Ibrahim iha Dili iha fulan kotuk. Nu'udar Prezidente, ho tema "Sustentabilidade no Inkluzividade", ami orgullu atu asiste marku ida-ne'e ne'ebé realiza durante Malázia nia jestaun, reflesaun ida husi kompromisu ASEAN nian bá unidade, inkluzividade no identidade rejionál ne'ebé fahe”. Enkuantu serimónia ne'e hala’o iha teritóriu Timor laran tomak. 𝐌é𝐝𝐢𝐚 𝐌𝐓𝐊
Data Publica : 28 Oct 2025
Descrisaun :
