Asuntu : MINISTRU EDUKASAUN INTERINU HALO ABERTURA BA FORMASAUN TEKNOLOJIA EDUKASAUN NO MÉTODU INOVATIVU Díli, 28 Outubru 2025 - Sua Exelénsia Ministru Edukasaun Interinu Sr. Domingos Lopes Lemos, halo abertura ofisiál ba kursu formasaun kona-ba teknolojia edukasionál no métodu inovadór ba Diretór eskola no Adjuntu sira, ne'ebé organiza husi INFORDEPE, iha Salaun Ian Martin Infordepe Tersa-feira ne’e. Iha diskursu Sua Exelénsia Ministru Edukasaun Interinu Sr. Domingos Lopes Lemos, hateten edukasaun mak baze ba dezenvolvimentu sustentavel iha nasaun idaidak. Maibé, dezafiu sira iha sékulu XXI ezije prátika pedagójika sira no integra ferramenta teknolójiku no estratéjia inovadór iha prosesu hanorin no aprende. "Ita- nia nasaun iha hela momentu istóriku. Horiseik, ofisialmente Timor-Leste sai membru permanente iha ASEAN ba sanulu resin-ida (11), momentu ida-ne'ebé reforsa kompromisu ba integrasaun rejionál, kooperasaun internasionál no fortalese Institusionál. Pasu ida-ne'e la'ós de'it polítiku no Diplomátiku, maibé mós edukativu no kulturál, tanba loke oportunidade foun ba aprendizajen, partilla esperiénsia no asesu ba rekursu ne’ebé sei benefisia diretamente ba profesór no estudante". Governante ne’e dehan, kursu ida-ne'e iha objetivu atu kapasita profesór sira husi Ensinu Sekundáriu Jerál no profisionál edukasaun seluk sira, hodi fó ba sira instrumentu modernu ne’ebé bele halo klase sai dinámika no interativa, estimula kriatividade no hanoin krítiku husi estudante, prepara juventude timoroan atu enfrenta mundu ne’ebé liu ba dijitál no interkonektadu. "Profesór mak protagonista boot iha transformasaun ida- ne'e. Teknolojia de' it la bele muda edukasaun. Maibé bele transforma maneira hodi uza teknolojia atu inspira, motiva no gia estudante. kursu ida-ne'e la'ós de'it sai espasu aprendizajen, maibé mós partilla, inovasaun no konstrusaun vizaun komún kona-ba futuru edukasaun".
Data Publica : 30 Oct 2025
Descrisaun :
