Sua Eselénsia Ministru Petróleu no Rekursus Minerais, Francisco da Costa Monteiro aprezenta Tersa-feira ne’e iha Konsellu Ministru, pedidu autorizasaun ba despeza ba dezenvolvimentu kampu gás Greater Sunrise no garante kadoras mai Timor-Leste.

Pedidu ne’ebé deliberadu iha Konsellu Ministru permite atu realiza despeza ho montante dólar amerikanu 16.055.897, ne’ebé sei ezekuta entre tinan 2025 no 2027, ho objetivu atu implementa Programa A13 husi Orsamentu Jerál Estadu nian, ne’ebé inklui dezenvolvimentu hosi kampu gás Greater Sunrise no realizasaun estudu no inisiativa nesesáriu sira hodi garante kadoras dada mai Timor-Leste.

Sua Eselénsia Ministru Monteiro fundamenta katak, kualkér despeza ne’ebé ho valór superior millaun 5, tenke hetan autorizasaun husi Konsellu Ministru, hodi inisia estudu, jeofíziku no sízmiku ho rezolusaun ultra-alta (UHRS) relasiona ho gazodutu esportasaun gás Greater Sunrise no gazodutu Bayu Undan, ne’ebé esensiál ba faze téknika no planeamentu projetu nian.

Relasiona ho negosiasaun, Ministru Monteiro tenik katak, prosesu negosiasaun téknika retoma ona iha fulan Outubru, hafoin negosiasaun intensa ho parseiru sira husi Austrália, hodi negoseia Kódigu Mineiru Petróleu, Regime Taxa no Kontratu Fahe Produsaun. Parte Osaka Gás, Woodside no TIMOR GAP, E.P., ko’alia ho estadu Timor-Leste no Australia hodi estabelese rejime kona-ba kapasidade (investability), hodi permite empreza sira halo tranzisaun ba kuadru legal sira ba investimentu Greater Sunrise no TLNG, no enkontru kontinuasaun sei akontese iha fulan Dezembru.

Dadaun ne’e, preparativu sira husi Suai Supply Base – SSB, auto Estrada no estudu tékniku espesífiku kona-ba kadoras ba Natarbora la’o hela.