𝐃𝐢𝐥𝐢, 𝟎𝟒 𝐍𝐨𝐯𝐞𝐦𝐛𝐫𝐮 𝟐𝟎𝟐𝟓 — Governu liuhosi Reuniaun Konsellu Ministru extraordináriu tersa-feira ne’e, aprova projetu Proposta Rezolusaun kona-ba Ratifikasaun ba Deklarasaun Admisaun Timor-Leste ba Asosiasaun Nasoins Sudeste Aziátiku (ASEAN).

Proposta Rezolusaun ne’e aprezenta hosi Ministru Negósius Estranjeirus no Kooperasaun, Bendito dos Santos Freitas iha sorumutu Konsellu Ministru ne’ebé lidera hosi Primeiru-Ministru, Kay Rala Xanana Gusmão, iha Palásiu Governu, Dili.

Hafoin aprova tiha iha Konsellu Ministru, Governu sei submete projetu proposta rezolusaun ne’e ba Parlamentu Nasionál ho intensaun atu ratifika Deklarasaun kona-ba Admisaun Repúblika Demokrátika Timor-Leste ba ASEAN, ne’ebé asina iha Malázia, iha loron 26 fulan-outubru tinan 2025, durante serimónia adezaun plena Timor-Leste nian ba organizasaun rejionál ne’e.

Deklarasaun ne’e reprezenta aseitasaun polítika husi Estadus-Membrus ASEAN kona-ba inkluzaun Timor-Leste nian nu’udar Estadu-Membru plenu direitu, tuir n. 4 artigu 6.º husi Karta ASEAN, ne’ebé nu’udar etapa esensiál ida ba integrasaun plena Timor-Leste nian iha mekanizmu no estrutura sira organizasaun nian.

Molok serimónia admisaun ofisiál, iha loron 25 fulan-outubru, bainhira remata enkontru Ministru Negósius Estranjeirus ASEAN nian, Ministru Bendito Freitas, submete instrusaun adezaun Timor-Lesta ba Karta ASEAN.

Adezaun bá karta ASEAN importante tebes liu-liu atu kumpre bá prinsípiu no valór sira ASEAN nian. Timor-Leste reafirma ninia prontidaun atu integra iha bloku rejionál ne'e, no kumprimentu sira nu'udar organizasaun ne'ebé bazeia bá regra sira.

Karta ASEAN adota iha 2007 no vigora dezde 2008, serve nu’udar konstituisaun ASEAN nian. Ida-ne'e fornese organizasaun ho personalidade jurídika, estabelese ASEAN nu'udar Komunidade ida ne'ebé bazeia ba regra no sentradu iha ema, no hatuur prinsípiu sira, objetivu sira, no enkuadramentu institusionál ne'ebé orienta ASEAN nia serbisu.

Ho adezaun ba Karta ASEAN nian, Timor-Leste afirma nia kompromisu ba valór sira ne’ebé fahe malu no vizaun koletiva ba Komunidade ASEAN ida ne’ebé inkluzivu, unidu no reziliente.

Instrumentu adezaun ba Karta ASEAN entrega diretamente ba Sekretáriu-Jerál ASEAN, Dr. Kao Kim Hourn no asiste direta hosi Ministru Negósius Estranjeirus sira hosi estatadu-membrus ASEAN.

https://timor-leste.gov.tl/?p=45912&lang=tp

Fontes: https://www.facebook.com/share/p/1FpoFHzegA/