Díli, 28-30 fulan-outubru tinan 2025__Programa Governu Austrália nian iha Timor-Leste liuhusi Programa TAF-Nabilan, realiza formasaun loron tolu (28-30 fulan-outubru tinan 2025) kona-ba Sistema Justisa no Enkuadramentu Legál Violénsia Bazeia ba Jéneru (VBJ) ba Funsionáriu/a SEI iha Salaun Agusta Serano-TAF Nabilan, Díli.

Formasaun ne’e ho objetivu atu Haforsa koñesimentu funsionáriu/a SEI kona-ba sistema justisa iha Timór-Leste; Identifika kazu sira ne’ebé tama iha kategoria kazu sivíl, krime públiku no krime semi-públiku; Haforsa koñesimentu funsionáriu kona-ba Enkuadramentu Legál VBJ; Haforsa koñesimentu kona-ba prosesu kazu tuir sistema justisa formál no Haforsa koñesimentu kona-ba papél rede referál, no oinsá refere kazu.

Diretór Nasionál Polítika Igualdade Jéneru-DNPIG, Sr. Abílio Barreto hamutuk ho Xefe ekipa Programa Nabilan Sra. Xylia Ingham, iha abertura hato’o agradese ba iha inisiativu TAF-Nabilan hodi organiza formasaun ne’e ba funsionáriu/a Sekretaria Estadu ba Igualdade (SEI). Nia hatutan katak formasaun ne’e importante tanba liga kedas ho Programa SEI iha área Prevensaun Violénsia Bazeia ba Jéneru.

Nia haktuir katak Governu dasiak liuhusi Sekretaria Estadu ba Igualdade kontinua haforsa no hametin enkuadramentu legál sira liga ho Prevensaun Violensia Bazeia ba Jéneru no atendimentu ba vítima feto no labaraik-feto no grupu vulnerável hirak seluk, tanba ne'e iha formasaun ida-ne'e la’ós atu mai tuir de’it hodi hetan sertifikadu maibé oinsá atu buka hatene kle’an kona-ba ekuadramentu legál sira ba Atendimentu Vitima husi Violénsia Bazeia ba Jéneru no Violénsia Doméstika atu nu'une bele aplika fali iha knaar sira liga ho Prevensaun Violénsia Bazeia ba Jéneru, Violénsia kontra Feto no Labaraik-Feto no ba Grupu Vulnerável hirak seluk. Diretór DNPIG deseja bom Aproveita no Votus Susesu ba Ekipa SEI tomak ne'ebé tuir formasaun durante loron tolu nia laran.

Formasaun ne’e fasilita no apoiu husi Programa TAF-Nabilan ho partisipante sira mai husi funsionáriu/a SEI hamutuk ema na’in 25.

#Média SEI#

Fontes: https://www.facebook.com/share/p/16QhidvEp8