𝐃𝐢𝐥𝐢, 𝟎𝟕 𝐧𝐨𝐯𝐞𝐦𝐛𝐫𝐮 𝟐𝟎𝟐𝟓 — Ministru Negósius Estranjeirus no Kooperasaun (MNEK), 𝐁𝐞𝐧𝐝𝐢𝐭𝐨 𝐝𝐨𝐬 𝐒𝐚𝐧𝐭𝐨𝐬 𝐅𝐫𝐞𝐢𝐭𝐚𝐬 parabeniza dansariña oan sira-ne’ebé mak konsege hatudu ona sira-nia performa aprezentasaun dansa iha momentu hodi selebra Timor-Leste ninia adezaun ofisiál ba ASEAN.

Serimónia ne’ebé hala’o iha salaun Nobre MNEK Praia dos Coqueiros, Dili ne'e, partisipa mós husi Vise-Ministra ba Assuntus ASEAN, Milena Rangel hamutuk ho kargus xefias no funsionáriu sira, iha loron ne’ebé Timor-Leste kompleta loron ona 11 sai membru plenu ASEAN ba dala 11, sura husi loron 26 fulan-outubru to’o loron 7 fulan-novembru 2025.

Iha loron 27 fulan Outubru foin lalais ne'e, iha marjen Simeira Xefe Estadu no Xefe Governu ASEAN ba dala 47 iha Kuala Lumpur, Malázia, Primeiru-Ministru, Kay Rala Xanana Gusmão, oferese resepsaun ida ba líder sira estadus-membrus ASEAN nian ho líder parseiru diálogu sira ASEAN nian hodi selebra Timor-Leste nia adezaun ba organizmu rejionál ne’e.

“Ohin ne’e 11 dias ita sai membru ASEAN sai mós membru ba númeru 11. Ohin ne’e atu hato’o agradesimentu ba alin dansariña oan sira. Ohin Sekretáriu-Jerál dehan tempu própriu ita sei hasoru malu agradese hamutuk iha tempu ida lívre hamutuk ita bele sente haksolok hamnasa oituan,” hatete Ministru Bendito ba dansariña sira.

Ministru Bendito mós enkoraja dansariña oan sira, atu kontinua estuda no aprende nafatin, tanba Timor-Leste sai ona membru plenu ASEAN, tanba ne’e, sei iha oportunidade no responsabilidade ba joven jerasaun foun sira atu lori nasaun ne’e ba oin no ba di’ak liután.

Liderasansa másimu MNEK ne’e mós, kongratula no agradese ba Vise-Ministra ba Assuntus ASEAN, Milena Rangel hamutuk ho ekipa tomak ba kooperasaun servisu ne’ebé halo durante ne’e ikus mai Timor-Leste sai ona membru ofisiál iha ASEAN.

Adezaun ba ASEAN la’ós sai kestaun ba Timor-Leste, maibé imporante mak iha pos-adezaun ne’e, presizamente kumpri nafatin rezikitus asosiádus ASEAN nian.

Governante ne’e hatutan, adezaun Timor-Leste nian ba ASEAN ne’e mós sei redús dependénsia Timor-Leste nian ba ameasas tradisionais sira ne’ebé mai husi li’ur.

Hafoin sai membru ASEAN, Ministru Bendito haktuir, Ministru Negósius Estranjeirus sira ASEAN mós promete ona atu vizita Timor-Leste, no possibilidade tuir orden alfabetu ne'ebé sei hahú husi Brunei Darrusalam no ikus iha Vietnam.

Alémde Membru Governu ASEAN sira, iha mós oportunidade boot ba investor sira husi ASEAN ne’ebé hakarak atu mai investe iha Timor-Leste.

Fontes: https://www.facebook.com/share/p/1A1xYxLNUJ