𝟎𝟔 𝐍𝐨𝐯𝐞𝐦𝐛𝐫𝐮 𝟐𝟎𝟐𝟓
=============
Primeiru-Ministru, Kay Rala Xanana Gusmão ho Vise-Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Dato’ Seri Francisco Kalbuadi Lay, kumprimenta hodi konversa ho deputadu sira husi kada bankada parlamentár hanesan, CNRT, FRETILIN, KHUNTO no PLP, hafoin debate iha jeneralidade bá Proposta Lei N⁰ 23/VI/(3ᵃ) Orsamentu Jerál Estadu (OJE) tinan fiskál 2026 bá loron daruak, sesaun lorokraik nian iha Parlamentu Nasionál, Kinta 06 Novembru 2025.

Iha debate jeneralidade ne’e deputadu sira levanta kestaun prinsipál sira ligadu ho bem-estar povu nian, no mós prestasaun servisu membru Governu nian iha tinan 2025 ne’e, atu nune’e iha tinan-oin mai bele mellora di’ak liu tan hodi atinji metas dezenvolvimentu ne’ebé sita ona iha planu Governu nian. 
 
Preokupasaun deputadu nian, membru Governu sira responde hotu tuir rezultadu servisu ne’ebé mak atinji ona iha tinan ida ne’e nia laran, hanesan hadi’a estrada, bee-moos, no setór sira seluk tan.

Proposta Lei OJE 2026 ho montante $2.214.689,195, fahe ba kategoria saláriu no vensimentu $476.870.249, bens no servisu korrente $447.904.446, transferénsia públika $820.710.160, kapitál menór $32.556.96 no kapitál dezenvolvimentu $436.647.379.