𝟎𝟖 𝐍𝐨𝐯𝐞𝐦𝐛𝐫𝐮 𝟐𝟎𝟐𝟓
==============
Vise-Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Dato’ Seri Francisco Kalbuadi Lay, iha Sábadu 08 Novembru 2025, akompaña Sua Exelénsia Primeiru-Ministru (PM), Kay Rala Xanana Gusmᾶo, hala’o vizita ba ró OceanXplorer husi Singapura ne’ebé atraka iha Portu Tibar, Díli.

Vizita ne’e ho objetivu hodi haree besik kondisaun ró ne’e inklui nia ekipamentu sira hanesan helikopteru no mós drone sira. 

Iha vizita ne’e, CEO ró OceanXplorer, Vincent Pieribone, halo esplikasaun klean kona-bá funsaun husi ekipamentu ne’ebé sei utiliza ba peskiza iha tasi-okos, bá PM, Vise-PM, membru Governu, membru Parlamentu Nasionál, no mós estudante sira.

Ró ne’e mai ho misaun ida atu halo peskiza iha tasi Timor-Leste durante semana rua hodi halo identifikasaun siéntifiku kona-bá potensialidade área tasi Timor, atu nune’e Governu bele proteje rekursu tasi ho di’ak, ró ne’e mós kompleta ho ekipamentu modernu hodi bele halo peskiza iha tasi.

Alende Vise-PM no PM, marka mós prezensa husi membru Governu, membru Parlamentu Nasionál inklui estudante sira. Tuir oráriu ró ne’e sei sai husi Timor-Leste iha loron 22, fulan Novembru, tinan ne’e.