07 Novembru 2025: Hodi Selebra loron komemorasaun Masakre Santa Cruz, Ministériu Saúde (MdS), iha koordenasaun ho Ministériu Juventude, Desportu, Arte no Kultura (MJDAC), Komité 12 de Novembro, SNAEM, SSM Díli no HNGV, organiza konsulta jerál ho tema “Ha’u ema Timor, Orgullu Ho Ha’u-nia Nasaun.”, iha resintu edifísiu MJDAC, Bidau Lesidere, Dili.

Atividade ida ne’e la’ós de’it atu oferese asisténsia saúde, maibé mós refleta espíritu nasionalizmu no orgullu hanesan ema Timor, nune’e mós fó oportunidade atu hato’o gratidaun ba sobreviventes 12 Novembru no komunidade em jerál.

Konsulta jerál refere hetan partisipasaun másimu hosi profisionál saúde sira husi área diferente hanesan, moras Laran (Internista), pulmonolojia, saúde mentál, saúde orál, saúde matan (Oftalmologia), moras la hada’et, programa TB no HIV, X-Ray AI, laboratoriu (Hasai Ran), konsulta jerál no servisu seluk tan.

Diretor Gabinete Planu, Polítika no Koperasaun (DGPPK) dr. Florindo P. Gonzaga iha biban ne’e hatete “Atividade ida ne’e kontribui diretamente ba indikador saúde nasional, ne’ebé iha tinan 3 liubá la konsege ultrapasa taxa konsultasaun 2%. Liuhusi programa konsulta jerál sira hanesan ne’e, MdS hatene katak taxa ida-ne’e bele aumenta to’o 5% iha tinan ida-ne’e, hanesan sinál progresu iha asessu no uzu servisu saúde.

Atividae hanesan ne’e importante tebes atu kontinua lori saúde ba to’o Aldeia no komunidade sira iha Suku, ho objetivu atu garante ema hotu simu kuidadu saúde ne’ebé justu no kalidade.”

“Iha ámbitu selebrasaun ne’e MdS mós aproveita momentu atu hato’o orgullu ba atinjementu sira iha nível Kuidadu Saúde Primária, hanesan eliminasuan Malaria no Linfatic Filariasis, no iha tempu badak sei elimina mós Trachoma no Yaws.

Konsulta jerál ne’e mós refleta lian unida no determinasaun povu Timor atu kontinua halibur forsa ba saúde no bem-estar povu tomak nian,” tenik DGPPK.