Segunda 10-11-2025

Ministra Solidariedade Sosiál no Inkluzaun Sra.Verónica das Dores hamutuk ho Vise-Primeiru-Ministru, Ministru Koordenadór ba Asuntu Sosiais no Ministru Dezenvolvimentu Rural no Abitasaun Komunitária Eng. Mariano Assanami Sabino akompañadu husi Embaixador Misaun Permanente Timor-Leste nian ba ONU Sr.Dionísio Babo Soares partisipa iha Plenária Simeira Mundiál ba Dezenvolvimentu Sosiál ne'ebe realiza iha sentru konvesaun nasionál, Doha, Qatar durante loron tolu hahú husi loron 4 to'o 6 Novembru tinan 2025.

Iha Simeira ida ne'e , Timor-Leste hetan oportunidade hamutuk ho nasaun 189 seluk hodi hato'o deklarasaun relasiona ho asuntu sosiál ne'ebe reflete husi deklarasaun Kopenhagen 1975 Simeira Sosiál Mundiál dahuluk.

Tuir deklarasaun polítika Doha, reflete fali kompromisu líderes Mundiál sira-nian husi Deklarasaun Konpenhagen 1995 no ajenda 2030 foka ba dezenvolvimentu sosiál iha pilar tolu mak hanesan:

Eliminasaun Pobreza

Fornese empregu ne'ebe produtivu no servisu dignu ba ema hotu-hotu

Inkluzaun Sosiál

Deklarasaun ne'e liga ba justisa sosiál no dame, seguransa no direitu umanu, promote atu la husik ema ida iha kotuk.

Timor-Leste nia envolvimentu iha Global Task Force On Social Protection for Nutrition (GTF) hatudu nia lideransa no kompromisu forte atu integra protesaun sosiál ho nutrisaun hanesan baze ba dezenvolvimentu sosiál no sustentável. Inisiativa global ida-ne'e fo plataforma ba nasaun sira atu fortalese sistema protesaun sosiál ne'ebé suporta nutrisaun di'ak, seguransa alimentar no moris saudável ba grupu vulnerável sira.

Iha Simeira Mundiál ba Dezenvolvimentu Sosiál loron datoluk molok enseramentu, Sekretária da Mesa fó oportunidade ba lideres husi nasaun balu hodi hato’o apresiasaun ba Deklarasaun polítika Doha relasiona ho Dezenvolvimentu Sosiál tuir ajenda 2030 ho prinsípiu: “LA HUSIK EMA IDA IHA KOTUK.”

Ho partisipasaun iha Simeira Sosiál Mundiál daruak ne’e, Timor-Leste konsolida liután nia an tuir Ajenda Global 2030 ba seguransa no protesaun sosiál.

Mídia MSSI.