Dili loron 11, fulan-Novembru, tinan 2025, Sekretáriu Estadu ba Formasaun Profisionál no Empregu, Sua Exelénsia Rogério Araújo Mendonça L.Ed, hala’o sorumutu ho Department of Foreign Affairs and Trade (DFAT) hodi kontinua kooperasaun no relasaun forte entre Governu Timor-Leste SEFOPE no Governu Australia DFAT. Iha sorumutu ne’e Sekretáriu Estadu mós hato’o Benvindu ba Sra. Kalo Tafolo nu’udar atuál Primeira Sekretaria (DFAT).

Iha sorumutu Sekretariu Estadu apresia no orgullu tebes tanba bele servisu hamutuk ho Governu Australia, ne’ebé haree liubá programa Mobilidade Laboral no apoiu tebes programa sira iha nasionál to munisípiu.

“SEFOPE servisu hamutuk ho Governu Australia liuhusi programa sira ne’ebé servisu hamutuk ho DFAT, Governu Australia sai hanesan parseiru ne’ebé di’ak tebes hodi ajuda SEFOPE liuliu iha programa Mobilidade Laboral no apoiu ba formasaun sira ne’ebé antes sentraliza de’it iha nasionál maibe agora expanda ona ba munisípiu”, tenik Sekretariu Estadu durante diskusaun.

Iha Propósitu prinsipál tolu durante diskusaun mak dahuluk finaliza formalmente “Exchange of Letters” (EoL) atu suporta Liaison Officer sira (CLO) iha eskema PALM, daruak hare ba Traballadór sira ne’ebé absconding ka sai husi sistema tanba ne’e fó influensia negativu ba empregadór sira iha futuru no ikus liu SEFOPE iha futuru hakarak hasa’e kuota traballadór ne’ebé iha abilidade no kualidade.

Partisipante sira S.E. Sekretáriu Estadu SEFOPE, Diretór Jeral Sr. Carlito do Rosario Cabral (DG-FPE), Sr. João Correia Pereira (DNEE) Sr. Mark Nicholson (Konselleiru), Tim Rae Sra. Kalo Tafolo (atuál Primeira Sekretária Embaixada Austrália), Sra. Fabia (Koordenadora PLMSP/Konseleira), Sra. Ovania Mendonça (Asistente, Embaixada Austrália).