Dili, 11 Novembru 2025

Ministru Transportes no Komunikasaun, Eng.Miguel Marques Gonçalves Manetelu tersa ne'e, simu Audiencia Embaixadór Japaun mai Timor-Leste Kimura Tetsuya no Xefe Reprezentantativu JICA iha Timor-Leste Daisuke FUKUMORI.

Enkontru ne’e realiza iha Gabinete Ministru Kaikoli Dili, iha okaziaun ne'e parte rua atualiza progressu kona-bá Konstrusaun Terminál Pasajeirus Aeroportu Internasionál Prezidente Nicolau Lobato no investimentu Empreza Tsuneishi Timorship Building iha Timor-Leste.

Embaixadór Japaun bá Timor-Leste reitera kompromisu Governu Japaun nian kona-bá konstrusaun no expanasaun Aeroportu no investimentu Empreza Tsuneishi nian iha Timor-Leste.

Antes ne’e iha loron 3 fulan-fevereiru tinan 2025, asina ona kontratu ida bá prestasaun servisu konsultária ho Konsórsiu Japan Airport Consultants, Ehira Architects and Engineers, Orientál Consultants Global no Nippon Koei, Ltd. Serimónia asinatura bá kontratu ne’e hala’o iha edifísiu Ministériu Transportes no Komunikasaun, Kaikoli Dili, ne’ebé sai sasin hosi Ministru Transportes no Komunikasoins, Miguel Marques Gonçalves Manetelu, Embaixadór Japaun iha Timor-Leste, Tetsuya Kimura no reprezentante husi Ajénsia Kooperasaun Internasionál Japoneza (JICA) iha Timor-Leste, Ito Mimpei.

Governu Japaun nian apoiu bá modernizasaun setór aviasaun sivíl Timor-Leste, kontribui bá hadi’a asesu aéreu Timor-Leste nian liuhosi konstrusaun terminál pasajeiru ida ne’ebé foun no modernu. Investimentu ida-ne’e la limita hodi hadi’a infraestruturas, maibé reprezenta mós kompromisu atu hadi’a konetividade no kria oportunidade ekonómika bá populasaun, haree bá “Timor-Leste iha dalan loos sai membru plenu ASEAN nian.

Projetu ida-ne’e sei kontribui maka’as bá adezaun país nian hodi aliña Timor-Leste nia infraestrutura ho padraun rejionál, Hanesan temi ona iha Programa Governu Konstitusionál IX nian, transporte aéreu dezempeña papél krusiál iha Timor-Leste nia dezenvolvimentu indústria turizmu, komérsiu no negósiu. Iha sentidu ida ne’e permite servisu aéreu ida ne’ebé konfiável liu entre Timor-Leste no destinu rejionál no internasionál sira hodi hatán bá pasajeiru atuál sira ne’ebé kontinua aumenta, sei implementa melloria sira ne’ebé planea ona bá Aeroportu Internasionál Prezidente Nicolau Lobato, tanba investimentu iha transporte aéreu importante atu hatán bá ezijénsia tráfiku aéreu iha futuru, ne’ebé iha relasaun ho kreximentu ekonómiku país nian.

Iha sorin seluk Empreza Tsuneishi Shipbuilding, hanesan empreza konstrusaun naviu ne’ebé mak koñesidu iha Japaun no iha mundu. Empreza TSUNEISHI hahú ona nia investimentu iha Timor-Leste liu husi planu atu hari shipyard/staleiru iha Laleia Manatuto nomos liu husi treinamentu bá engenheiru foin-sae Timor oan sira.

Empreza husi Japaun ne’e sira nia priorodade iha Postu Administrativu Laleia bazeia bá rezultadu estudu viabilidade ne’ebé halo ona. sira laiha opsaun sira seluk. Empreza husi Japaun ne’e mós iha komunikasaun di’ak ho komunidade iha Laleia no kompremetidu atu kontinua halo implementa projetu ne’e iha Laleia. Tuir rekomendasaun husi Embaixadór, sira nia negosiu mak atu hari ro peska nian.

Iha tempu hanesan, Ministru Transportes no Komunikasoens apresia bá apoiu no komitmentu governu no povu Japaun nian bá projetu importante sira iha Timor-Leste, liu-liu kona-bá Aeroportu no Investimentu Empreza Tsuneisho iha.

Ministru Manetelu mós kompromete atu aselera prosesu hotu-hotu relasiona ho prepasaun bá tenderizasaun bá Konstrusaun Terminál Pasajeirus iha Aeroportu Internasionál Prezidente Nicolau Lobato no husu atu iha diskusaun no atualizasaun regulár kona-bá andamentu no progresu inklui dezafius ruma ne’ebé empreza Tsuneishi hasoru iha ezekusaun planu investimentu nian.

𝐌𝐞́𝐝𝐢𝐚 𝐌𝐓𝐊