𝐀𝐢𝐥𝐞𝐮, 𝟎𝟖 𝐍𝐨𝐯𝐞𝐦𝐛𝐫𝐮 𝟐𝟎𝟐𝟓

Primeiru-Ministru, Kay Rala Xanana Gusmão akompañia husi Ministru Obras Públikas, Samuel Marçal, inklui membru governu sira seluk lansa fatuk dahuluk bá projeitu rehabilitasaun estrada diresaun husi Seloi-Kraik "Aileu" bá Tokoluli "Gleno, Ermera".

Iha intervensaun Primeiru-Ministru, Nonu Governu Konstitusionál, Kay Rala Xanana Gusmão, hateten, hafoin lansa tiha projeitu rehabilitasaun estrada ne'e, bainhira iha implementa husu komunidade sira atu koopera labele bá impede kompañia bainhira sira halo servisu, se komunidade sira halo impedementu projeitu ne'e sei lala'o.

"Hanesan iha fatin balu komunidade sira sunu tiha ekipamentus, se ida ne'e akontese entaun di'ak liu ita labele hadia estrada. Ne'e duni ami hotu ne'ebé hamriik iha ne'e fiar katak komunidade liuliu joven sira atu hotu-hotu partisipa aselera lalais projetu ida ne'e hodi ita halo fali buat seluk," dehan Primeiru Ministru bá komunidade sira iha seremónia hatuur fatuk dahuluk bá projeitu rehabilitasaun estrada Seloi-kraik, sabado ne’e.

Tamba ne'e bainhira projeitu ne’e implementa ona, pessoal balun mai impede obra ne'e maka, sei muda tiha projeitu ne'e bá munisípiu sira seluk ne'ebé presiza.

Iha fatin hanesan, Ministru Obras Públikas, Samuel Marçal, hateten orgllu tanba kompañia Timor Oan ida bele kompete ho kompañia internasionál bá projeitu rehabilitasaun estrada ne'e no konsege manan iha prosesu tendererizasaun internasionál.

Ha’u orgullu tanba foin primeira vez kompañia timor oan ida kompete ho kompañia internasionál hodi sai vensedor bá projeitu rehabilitasaun estrada husi Seloi-Kraik bá Tokoluli. Ohin ita hotu mai iha ne'e ita la'ós hatuur de'it fatuk maibé lori mós kontratu mai asina iha povu nia oin, tanba projeitu ne’e gasta osan povu nian no projeitu ne'e sai na'in bá ita hotu-hotu,"hateten Ministru Obras Públikas.

Ministru Obras Públikas haktuir, bainhira kompañia refere mai implemente ona povu mós iha direitu atu tau matan no involve iha prosesu dezenvolvimentu ne'e, signifika joven sira ne'ebé hakarak servisu bele bá rejistu iha kompañia hodi hetan oportunidade.

"Husu bá joven sira, imi bele ajuda hada fatuk, hadia valeta, hodi bele ajuda ekonómia família uma laran," tenik Ministru Obras Públikas.

Kona-bá aldeia balun ne'ebé seidauk asesu bá eletrisidade Ministru Obras Públikas hateten, iha tinan 2026 fulan-Janeiru bele hahú asina kontratu bá aldeia sira, nune'e husu komunidade kalma uitoan tanba prosesu ne'e la'o hela.

Prezidente Autoridade munisípiu Aileu, João Bosco dos Santos, iha nia intervensaun, hato'o agradese bá Nonu Governu konstitusionál tanba foin ukun tinan rua, konsege halo lansamentu bá estrada diresaun Seloi-kraik bá Tokoluli Glenu, aleinde ne'e dezenvolvimentu bá estrada antes ne'e mós implementa tiha ona iha Lekidoe entaun lakleur tan kondisaun estrada sei di'ak bá ema hotu.

Iha biban ne'e mós PAM Aileu nafatin husu bá Governu atu rehabilita estrada urbana iha Aileu laran.

Enkuantu projetu rehabilitasaun estrada husi Seloi-Kraik bá Tokoluli ne'e implementa husi kompañia Marabia, Lda ho nia durasaun servisu tinan ida ho balun ho montante orsamentu hamutuk millaun $14,034,102.63.

Partisipa iha seremónia lansamentu projeitu rehabilitasaun estrada ne'e, Ministra Finansas, Santina José Rodrigues F. Viegas Cardoso, Ministru Justisa, Sérgio de Jesus Fernandes da Costa Hornai, Ministru Agrikultura, Pekuária, Peska no Florestas, Marcos da Cruz, Ministru Planeamentu no Investimentu Estratéjiku, Gastão Francisco de Sousa, Vise-Ministru bá Infraestruturas, Júlio do Carmo, Vise-Ministru Administrasaun Estatál, Jacinto Rigoberto G. de Deus, Sekretáriu Estadu Komunikasaun Sosiál Expedito Dias Ximenes, Sekretáriu Estadu Formasaun Profisionál no Empregu, Rogério Araújo Mendonça, Sekretáriu Estadu bá Protesaun Sivíl, Domingos Mariano Reis, Komando PNTL Munisípiu Aileu, Autoriedade Postu-Administrativu, Aileu, Prezidente Autoridade Munisípiu Ermera, Autoriedade lokál sira inklui komunidade husi Seloi-Kraik no komunidade sira husi Tokoluli.

*𝐌𝐢́𝐝𝐢𝐚-𝐌𝐎𝐏