𝐃𝐈𝐋𝐈, 𝟏𝟐 𝐧𝐨𝐯𝐞𝐦𝐛𝐫𝐮 𝟐𝟎𝟐𝟓 (𝐒𝐑𝐏) – Ministru Interior, Francisco da Costa Guterres, Ph.D, akompaña Primeiru-Ministru (PM), Kay Rala Xanana Gusmão, hala’o lansamentu ofisiál bá projetu konstrusaun edifísiu Kuartél Jerál Polísia Nasionál Timor-Leste (PNTL) foun ne’ebé lokaliza iha Suku Caicoli, Dili.

Iha diskursu Ministru Interior lori Guvernu nia naran agradese ba entidades hotu ne’ebe servisu hamutuk hodi dudu prosesu tomak ikus mai konsege halo edifisiu foun ba PNTL.

“Hau lori Primeiru-Ministru nia naran hakarak hato agradese wain ba instituisaun sira hotu ne’ebe maka ajuda tebes Ministeriu Interior liu hosi PNTL liu-liu bele rezolve tiha problema ida ne’e hodi ita bele hahu fali konstrusaun foun ba edifisiu foun PNTL. Edifisiu ida ne’e sei sai hanesan simbolu ida hodi PNTL sira servisu ho profesional ho disiplina”, hateten Ministru Francisco, iha Kuartel Jeral PNTL, Caicoli, kuarta (12/12/2025).

Nia dehan, Guvernu sei kontinua tau orsamentu hodi bele hari edifisiu ho kualidade hodi PNTL hotu bele halo sira nia servisu ho dignu.

“Tuir mai hakarak hato’o agradese wain ba kompañia Shanghai, apezar iha problemas lubuk bot ida ita tenke lao kuaze tinan 8 ita konsege hahu fali ohin ne’e, sira mos kolabora tebes ita konsege rezolve hodi hakat ba konstrusaun foun ida ne’e. Nune’e mos ba iha parte tekniku sira hosi Ministeriu Interior no PNTL ne’ebe apoiu tebes hodi ita ajuda malu hodi rezolve problema ida ne’e. Hakarak agradese mos ba embaixadora Xina katak, ho sira nia tulun maka ohin loron ita konsege halo segundu lansamentu ba edifisiu PNTL nian ida ne’e”, tenik tan.

Rekorda fali katak projetu konstrusaun ne’e responsabiliza hosi kompañia internasionál Shanghai Construction Group Co., Ltd, ho orsamentu $13,228,909.78, durasaun tempu hahú hosi fulan-Outubru 2025 to’o Setembru 2027.

“Ita espera katak konstrusaun ida ne’e sei remata iha tinan 2027 tanba ne’e husu ba ita hotu atu tau matan para konstrusaun ida ne’e lao ho kualidade atu nune sai hanesan edifisiu ida ne’ebe hamahon PNTL tomak iha teritoriu laran tomak”, tenik tan.

Governante ne’e sente kontente tanba ekipa tekniku sira konsege rezolve dezeñu ida ne’ebe hahu kedas iha 2014. Hafoin halo tiha primeiru lansamentu iha inisiu fulan janeiru tinan 2020 hasoru kedas problema iha nia fundasaun. Hafoin iha tinan 2023, tekniku sira konsege redezeña fila fali para bele kapta ba situasaun hodi konstrusaun ne’e bele lao ho diak, tanba karik kontinua lao ho dezeñu anterior ne’e ita la konsege halo konstrusaun foun ne’e.

Serimonia ne’e hetan paritisipasaun hosi Embaixadora Xina iha Timor-Leste, Wang Wengli, Komandante Jerál PNTL, Komisáriu Jerál Henrique da Costa, Xefe Estadu Maiór Jenerál Forsa Armada, Tenente Jenerál Domingos Raul Falur Rate Laek, Parseru Dezenvolvimentu sira, Korpus Diplomata ba kooperasaun sira, Prezidente Autoridade Munisipiu Dili, tekniku sira hosi PNTL SGP, CNA, ADN, MPIE, MOP MF, MTK no-mos Diretores Nasionais sira hosi miniteriu relevante. #AX

Fontes: https://www.facebook.com/share/p/1Bk9DWdH7x/