𝐃𝐢𝐥𝐢, 𝟏𝟏 𝐧𝐨𝐯𝐞𝐦𝐛𝐫𝐮 𝟐𝟎𝟐𝟓 — Ministru Negósius Estranjeirus no Kooperasaun, 𝐁𝐞𝐧𝐝𝐢𝐭𝐨 𝐝𝐨𝐬 𝐒𝐚𝐧𝐭𝐨𝐬 𝐅𝐫𝐞𝐢𝐫𝐚𝐬 ho Membru Governu akompaña Primeiru-Ministru, 𝐊𝐚𝐲 𝐑𝐚𝐥𝐚 𝐗𝐚𝐧𝐚𝐧𝐚 𝐆𝐮𝐬𝐦𝐚̃𝐨 hala’o enkontru despedida ho kontinjente Timor-Leste ne’ebé sei ba hala’o misaun apoiu umanitáriu iha Repúblika Filipina durante loron 20 nia laran.

Forsa Tarefa Konjunta bá Apoiu Umanitáriu iha Filipina ne’e Komanda husi Tenente Koronel Graduadu Vitorino Soares, hodi hala’o misaun solidariedade Timor-Leste nian atu hatán ba efeitu husi Tufaun Kalmaegi ne’ebé akontese iha Provínsia Cebu, Repúblika Filipina.

Kontinjente Timor-Leste ne’e kompostu husi membru F-FDTL na’in 120, Bombeirus na’in 20, tékniku husi Institútu Jestaun Ekipamentu na’in 4, Media 2, Pessoál Saúde na’in 6, MNEK na’in 7 inklui mós membru PNTL.

Primeiru-Ministru, Kay Rala Xanana Gusmão, husu ba kontinjente sira atu hala’o servisu ho laran hodi ajuda salva povu filipinu sira-ne’ebé afetadu husi Tufaun Kalmaegi, ne’ebé hamosu inundasaun maka’as, destruisaun no ema mate ne’ebé trájiku iha provínsia sentrál sira país nian, liuliu iha provínsia Cebu.

“Ne’ebé imi ba servisu ne’e hodi hatudu katak, loos imi ba atu ajuda hadia, katak, hadia moris aat ida-ne’ebé agora sira enfrenta hela ne’e. Imi ba ne’e ida-idak reprezenta povu ida-ne’e, maske kolen no moras maibé kuandu bele halo, hatudu katak, ita ba ne’e la’ós atu foti Timor-Leste nia naran, ita ba atu fó apoiu, ita ba ho misaun ida atu fó apoiu, atu ajuda,” hatete Xefe Governu, Xanana Gusmão.

Eis-Komandante Em-xefe-das-FALINTIL ne’e afirma, Timor-Leste nia adezaun ba ASEAN la’ós atu simu no halo funu de’it, maibé atu kontribui ba hametin páz no estabilidade iha rejiaun liuhusi apoiu umanitáriu entre estadu-membru ASEAN.

Tanba ne’e, forsa armada simu tan misaun foun ida katak, liuhusi apoiu solidariedade no umanitáriu ne’e, atu bele hametin liután relasaun entre ema ho ema iha rejiaun ida-ne’e.

Fonres: https://www.facebook.com/share/p/16RukFfRvU/