Dili, 13 Novembru 2025

Hafoin partisipa debate OJE 2026 iha Parlamentu nasionál iha loro-kraik Ministru Transporte no Komunikasaun, Eng.Miguel Marques Gonçalves Manetelu hetan entrevista husi Jornalista GMN-TV, relasiona ho notisias ne’ebé fó sai iha pájinahttps://sumba.inews.id/ hateten Penerbangan Langsung Kupan-Dili Segera di buka.

Hatan bá pergunta husi jornalista GMN, Ministru Manetelu hatete nia hakfodak bainhira notisias ne’e fó sai iha media sosiál.

“Hau hakfodak hetan informasaun husi facebook, uluk komérsiu dehan atu aluga mas depois sira dehan la kleur tan aviaun atu semo, to’o agóra Ministériu Transportes no Komunikasaun ne’ebé tutela mós autoridade aviasaun sivil ami rasik seida’uk hetan informasaun ida. Governu Timor-Leste lahatene situasaun ida ne’e, ita la hatene kona-bá notisias pode ser sira mak ko’alia iha ligasaun husi Timor ne’e ita lahatene” dehan Ministru Manetelu.

Ministru Manetelu afirma to’o agora Governu Timor-Leste seida’uk hetan informasaun husi Governu Indonézia kona-bá Aeroportu El Tari kupang loke ona hanesan Aeroportu Internasionál ka lae, tanba iha pasadu iha fulan hirak liu bá ka tinan ida liu bá Indonézia hasai sira nia polítika ida taka aeroportu balu ne’ebé uluk hanesan Aeroportu Internasionál, sai fali Aeroportu domestiku deit.

Governante ne’e reforsa liu tan katak Voo direta husi Kupang mai Dili sei la akontese ita la bandu aviaun sira ne’e atu semo mai Timor-Leste.

“Bainhira seida’uk iha autorizasaun aviaun seida’uk bele altera iha Timor-Leste, hanesan mós bainhira ita lori kareta tama sai fronteira mós ita tenke trata dokumentus, ne’ebé aviaun atu semo bá rai rua ne’e laos ita bandu mas ami hakfodak, ita tama ona ASEAN ita la bandu maibé buat hotu tuir nia prosesu ”Ministru Manetelu reforsa.

Governante ne’e mós esplika bainhira aluga aviaun mós hanesan siknifika sira mós tenke Haruka karta mai Ministériu Negósiu Estranjeiru, hafoin ne’e Ministériu Negósiu Estranjeiru Haruka nota verbál bá Ministériu Transporte no Komunikasaun, hanesan Ministru sei hasai despaixu bá Autoridade Aviasaun Sivíl para autoriza aviaun altera, mais Kuandu dehan voo regulár nia prosesu ne’e naruk laos dehan ohin hakarak mai aban atu mai ne’e lae, mais to’o agóra lahetan dokumentu ruma ne’ebé iha pedidu ruma para hare atu haree prosesu ne’e bá oin.

𝐌𝐞́𝐝𝐢𝐚 𝐌𝐓𝐊