𝘿𝙞𝙡𝙞, 13 𝙉𝙤𝙫𝙚𝙢𝙗𝙧𝙪 2025- Ministériu Komérsiu no Indústria (MCI) asina kontratu ho empreza manan nain ba implementasaun projetu konstrusaun merkadu Munisipiu Baucau no projetu konstrusaun ba Sentru Nasional Incubasaun iha Dili, iha seremónia ofisiál ne'ebé realiza iha sala gabinete Ministru MCI, edifísiu Fomentu Mandarin Dili.

Emprezariu sira ne'ebé hetan kontratu mak konsorsiu entre kompañia husi Indonézia, China no Timor-Leste, hanesan tuir lista:
•⁠  ⁠PT. Wahana Krida Konsulindo (Indonesia) iha konsórsiu ho PT. Trideconst (Indonesia) no Felix Nimis Unipessoal Lda (Timor-Leste)
•⁠  ⁠Fujian Yongtai Construction Group Co. Ltd (China) iha konsórsiu ho Suhurama Developer Unipessoal Lda (Timor-Leste)
•⁠  ⁠Jiangsu Zhuoxu Construction Co. Ltd (China) iha konsórsiu ho Yongling Holding Unipessoal Lda (Timor-Leste).

Projetu merkadu Munisipiu Baucau sei kontribui ba modernizasaun infraestrutura komérsiu iha nivel lokal, hodi aumenta aksesibilidade seguransa no kondisaun ambiente ba vendedór sira no konsumidór sira.
 
Sentru Nasional Incubasaun sei fó espasu ba inovasaun formasaun no apoiu ba emprendedór foun sira hanesan parte husi estratéjia MCI atu sustenta dezenvolvimentu setor privadu.

Empreza manan nain sira, sei responsavel atu implementa  tuir padraun tékniku no seguransa ho supervizaun regular husi ekipa téknika relevante. Projetu sira ne'e sei hahú tuir planu kalendáriu ne'ebé akordu iha kontratu.

Ministériu Komérsiu no Indústria kontinua fo kompromisu atu promove dezenvolvimentu infraestrutura komérsiu susténtavel, inovador no inkluzivu hodi fó impaktu pozitivu ba ekonomia nasionál no komunidade lokal.

Media MCI