Kuala Lumpur-Malázia, loron 3 fulan-novembru tinan 2025, Sra, Olga da Costa Monteiro, Diretora Nasionál ba Dezenvolvimentu Igualdade Jéneru-SEI no Sra. Santina Soares, Assesora ba Polítika Igualdade jéneru no Asuntu ASEAN-SEI partisipa iha Kolókiu Rejionál kona-ba “From Declaration to Action: Exploring Parthways and Paetnership for Advancing the ASEAN Care Agenda”, (Husi Deklarasaun ba Asaun: Esplora Dalan no Parseria Sira Atu Avansa Ajenda Kuidadu ASEAN) ne’ebé realiza iha Kuala Lumpur-Malázia.

Workshop ne’e organiza hamutuk entre Lao Women’s Union (LWU) no Ministériu ba Feto, Família no Dezenvolvimentu Komunidade (KPWKM) husi Malázia, hanesan pontu fókal ba ASEAN Komité kona-ba Feto (ACW-sigla Inglés), ho apoiu husi DFAT Austrália, UN-ESCAP, Fundasaun Ázia, Oxfam iha Ázia, no Sekretariadu Jerál ASEAN.

Kolókiu ne’e nia objetivu atu esplora oportunidade atu avansa Ekonomia Kuidadu iha rejiaun ASEAN, partilla esperiénsia, no buka dalan atu aumenta kolaborasaun entre Estadu Membru sira. Inisiativa ida-ne’e mós parte husi esforsu ASEAN atu implementa ASEAN Declaration on Strengthening the Care Economy no kontribui ba ASEAN 2045: Our Shared Future.

Iha abertura kolókiu ne’e oradores sira hato’o bemvinda ba Timor-Leste ne’ebé mak sai ona membru plena ASEAN nia ba da-sanulu-resin-ida hanesan momentu istóriku ida ba ASEAN. Iha kolókiu ne’e Sra. Olga da Costa Monteiro, hato’o intervensaun hanesan membru plena ASEAN Committee on WOMEN (ACW) hodi fó apresiasaun ba membru ASEAN hotu nia apoiu hodi Timor-Leste sai ona hanesan membru plena ba ASEAN. Agredese mós ba Governu Malázia, liuliu ba ACW Malázia, ne’ebé sai uma-na’in ba organiza enkontru importante ida-ne’e, no mós ba UN-ESCAP tanba apoiu ona Timor-Leste atu hola parte iha diskusaun importante ida-ne’e ba dahuluk hafoin hanesan membru kompletu husi ACW. Hanesan membru foun iha família ASEAN, Timor-Leste sente onradu boot atu hola parte iha viajen koletivu ida atu kontribui ba kestaun ekonomia kuidadu tanba ekonomia kuidadu ne’e hanesan pilár importante ida atu hetan igualdade jéneru, protesaun sosiál, no dezenvolvimentu sustentável ne’ebé sai hanesan prioridade nasionál Timor-Leste nian.

#Média SEI#

FONTES: https://www.facebook.com/share/p/19QCzQ1Axg/