2025-11-14: Parlamentu Nasionál aprova ona proposta orsamentál Prezidénsia Konsellu Ministrus nian ba tinan 2026 ho votus a favór 42, abstensaun 22 no kontra zero. Orsamentu ne’e, ho valór totál dolar amerikanu millaun 4,9, no sei utiliza atu finansia programa rua no subprograma hitu.

Programa Polítika Estratéjika Nasionál, ho orsamentu dolar amerikanu millaun 2,09, kobre área sira hanesan apoiu ba Primeiru-Ministru iha koordenasaun serbisu governu nian, governasaun legál, tradusaun jurídika, koordenasaun polítikas públikas, komunikasaun estratéjika no asuntus parlamentares.

Programa Funsionamentu no Dezenvolvimentu Institusionál, ho montante dolar amerikanu millaun 2,8, asegura funsionamentu administrativu no dezenvolvimentu organizasionál instituisaun nian.

Proposta orsamentál ne’e mós inklui dolar amerikanu millaun 3,1 ba saláriu no vensimentu, dolar amerikanu millaun 1,77 ba beins no servisus no dolar amerikanu rihun 50 ba despezas kapitál menór.

Kona-ba ezekusaun orsamentál, Prezidénsia Konsellu Ministrus iha tinan 2024 atinje 87,8% no, iha tinan 2025, to'o agora, atinje ona 87%.

Fontes: https://www.facebook.com/share/p/1ANJwiMtMW/