15 novembru 2025  
==============
Vise-Primeiru-Ministru no Ministru Koordenadór ba Assuntu Ekonómiku, Ministru Turizmu no Ambiente, Dato' Seri  Francisco Kalbuadi Lay akompaña Primeiru-Ministru, Kay Rala Xanana Gusmão iha Sábadu kalan, 15 Novembru 2025 partisipa iha serimónia han-kalan ne’ebé oferese husi Embaixadór ASEAN sira-ne’ebé rezidente iha Dili, hodi Selebra Adezaun ofisiál Timor-Leste nian hanesan membru ba dala 11 iha ASEAN.

Jantar bá selebrasaun Timor-Leste nia Adezaun bá ASEAN ne'e, partisipa mos husi Prezidente Repúblika, José Ramos-Horta, Vise Prezidente Parlamentu Nasionál, Membru Governu no seluk tan iha Otel Palm Springs, Fatuhada-Dili.

Embaixadór Malázia iha Timor-Leste, Amarji Sarjit Sinh reprezenta Embaixadór ASEAN agradese ba Xefe Estadu, Xefe Governu no membru governu sira ne’ebé disponibiliza ona tempu hodi partisipa iha serimónia han-kalan ne’e, hodi selebra Timor-Leste nia adezaun ba ASEAN ne’ebé ofisialmente hala’o iha ona loron 26 fulan-outubru foin lalais ne’e iha Malázia.

Diplomata Malázia dehan tan, diplomata ASEAN sira iha Dili sente kontente tebes maka oferese jantar ida-ne’e. Jantar refere hanesan momentu istóriku ida ne’ebé la’ós de’it atu selebra Timor-Leste nia adezaun ba ASEAN, maibé atu hametin liután relasaun entre grupu no estadu-membru ASEAN sira espesialmente iha Timor-Leste.

Nune’e mós Primeiru-Ministru, Kay Rala Xanana Gusmão, agradese ba Primeiru-Ministru Malázia, Dato’Seri Anwar Ibrahim, ba nia kompromisu pesoál hodi fó apoiu tomak ba Timor-Leste atu sai membru plenu ASEAN ba dala 11.

Ho adezaun ba ASEAN ne’e, PM Xanana afirma, hahú agora mak atu halo servisu barak liután, tanba sai membru iha ASEAN nakonu ho responsabilidade ne’ebé boot ho dezafius oi-oin, maibé garante atu orienta tuir prinsípiu sentralidade ASEAN nian.

Haree ba akontesimentu dezastra natural ne’ebé akontese la’ós de’it iha Filipina, Bali no nasaun membru sira seluk, iha ámbitu espíritu solidariedade, maka nasaun membru tau forsa hamutuk hodi ajuda nasaun ne’ebé enfrenta hela problema hirak-ne’e.

Primeiru-Ministru, Kay Rala Xanana Gusmão akresenta, Timor-Leste halo esforsu sai membru ne’ebé di’ak iha ASEAN la’ós atu kompete, maibé, sei aproveita oportunidade hirak-ne’e atu diskute assuntu sira kona-ba ekonomia, dezenvolvimentu kapital umanu liu-liu iha kontextu harii estadu no nasaun.

Haree ba situasaun iha mundu ohin loron, PM Xanana husu estadu-membru ASEAN sira atu hamutuk nafatin hodi defende kooperasaun paz no bazeia ba espíritu no objetivu ASEAN nian.

Entretantu, Embaixadór sira husi nasaun membru ASEAN ne’ebé dadaun ne’e rezidente iha Dili mak hanesan, Indonézia, Malázia, Singapura, Filipina, Tailándia, Cambodia, Brunei Darrusalam.